【阿米爸】拆解報讀小一迷思 信耶穌一定多5分？

小一自行分配學位每年9月展開，家長可以為子女揀選全港任何一間官津小學報讀，收唔收就睇你有幾分（計分方法），龍年出生率咁高，今年名校來講，無25分嘅話都唔駛旨意。正因為咁，宗教分呢5分，好多時候就成為勝負關鍵。

家長「自欺欺神」，為咗小朋友可以拎多5分而領洗、受浸、皈依，敢講一定有，我亦非常唔認同呢種行為。但如果家長以為自己或小朋友，同學校嘅宗教一樣，就代表5分袋袋平安，咁係未必正確。先講基督教，因為比較複雜。

基督教學校

基督教有好多個堂會，聖公會、浸信會、中華基督教會、中華宣道會、循道衛理…數之不盡。

以聖公會為例，係超過50間官津小學嘅辦學團體，但唔同聖公會小學都有自己俾宗教分嘅準則，有啲要父母其中一方係教徒，有啲一定要小朋友已經受浸。

^協恩中學附屬小學

好似非常受家長歡迎嘅「協恩中學附屬小學」，要拎呢5分一啲都唔容易，首先小朋友一定要係教徒，其次仲要喺聖公會嘅教堂受浸，如果係其他堂會受浸，Sorry。中西區名校「聖士提反女子中學附屬小學」，同樣都係用呢個準則俾宗教分。

^中華基督教會基灣小學（愛蝶灣）

港島區其中一間大熱學校，「中華基督教會基灣小學（愛蝶灣）」嘅5分宗教分，就容易拎少少，首先要牧師簽名證明小朋友有恆常參與教會活動，然後父母其中一方要係教友，受浸教會必須喺「華人基督教聯會」教會名錄入面，或者係「基督教協進會」的會員。