【傻夫婦】長洲吃喝玩樂親子一天遊@20160916

2016年 9月16日 (星期五)

難得一日的中秋假期，大頭小丸都唔使上興趣班，即刻約埋國皇之家和80後媽媽，三家人一齊去長洲玩返一日啦﹗由中環出發，大約是 35-55分鐘的船程 (視乎普遍船/ 快船)，約了 11:00，不到 12:00 已經到長洲啦﹗

第一站去食長洲有名的大魚蛋【甘永泰魚蛋】﹗好似都是去長洲必食之一，但其實依家都有好多檔賣大魚蛋，我都唔知邊檔是最正宗，反正上次食過覺得好好味，今次都食番呢檔啦﹗ 

一睇就知大頭妹有潔癖﹗小丸子就太豪邁了吧﹗

一人一串﹗

第2站飲 『冰滴咖啡』，食完大魚蛋，一轉入旁邊的行仔，就見到【長洲冰滴咖啡】﹗我唔好咖啡的，阿旺話 $29 咁平就試一次啦﹗小朋友見到冰滴咖啡都覺得好好奇，最後我地一人都買咗一杯﹗

食咗少少嘢，我哋就去公園玩啦﹗其實我唔明點解去到長洲都要玩公園，不過小朋友開心就得啦，同佢哋出嚟玩都是想佢哋開心，我地大人有得飲飲食食，就是 bonus，哈哈，要感恩﹗

去公園時見到原個『冰凍西瓜盅』$30/個，我哋又一家一個買嚟試下，真是好正好消暑，我哋買時已經是最後 3個，之後好多人問我哋係邊度買，已經賣晒啦﹗檔主話聽到要打風，所以唔敢入太多貨，點知 3日長假的第一日中午前已經賣晒﹗

睇下小丸子個樣，除咗食…佢個腦仔…都是得食…

玩完公園又是時候醫肚啦﹗第三站去食國皇之家介紹的老字號【長洲張記】，店員推介: 魚蛋﹑蛋片頭﹑墨魚丸﹗

嘩哈哈…食完又食…真是食唔停﹗ 食完魚蛋粉，一出門口，又遇到上一次去長洲時太多人排唔到的『芝士焗蠔』，今次唔使排就梗係要試下啦﹗阿旺食芝士焗蠔，我就食芝士焗帶子﹗上面有滿滿的薯蓉好好味，但如果一心食蠔/ 帶子的，可能就會失望啦，即是阿旺，因為…好細件架咋﹗我鍾意食芝士，又鍾意食薯蓉，所以覺得好好味，但如果要排 30分鐘，就唔值得。

芝士焗蠔/$25@

我哋一路行一路行，其實想去『張保仔洞』，點知要排成 1小時先入到﹗最後我哋以投票的方式決定排唔排，我棄權咗…最後 5比 4決定唔排，得 4個男仔話要排，我其實無所謂，多我一票就打和，半天吊所以都是唔舉手﹗同埋係我 2個女叫晒 “救命”，點解佢哋咁唔捱得苦架﹗唉﹗主要係行去張保仔洞條路都好遠，大家都行得好辛苦，走的時候發現原來有艇仔坐，下次識得坐艇仔，舒舒服服去到，就唔怕排隊啦﹗

回程時我哋就坐咗啦﹗大人 $10，小朋友 $5﹗

返到去碼頭嗰邊的最後一擊食甜品﹗入得嚟長洲點可以唔食芒果糯米糍，雖然依家好多地方都有﹗

哈哈…一放低…見到好多對小朋友的手﹗

我叫的芒果沙冰又比小丸子搶咗﹗

大頭妹的芒果布丁﹗

小丸子的豆腐花﹗

最後，朗媽要買紅豆糕俾朗爸，我哋都是第一次食，其實好似好多好多豆的砵仔糕﹗

甘永泰魚蛋

http://www.openrice.com/zh/hongkong/r-%E7%94%98%E6%B0%B8%E6%B3%B0%E9%AD%9A%E8%9B%8B-%E9%95%B7%E6%B4%B2-%E6%B8%AF%E5%BC%8F-r23205

長洲冰滴咖啡

http://www.openrice.com/zh/hongkong/r-%E9%95%B7%E6%B4%B2%E5%86%B0%E6%BB%B4%E5%92%96%E5%95%A1-%E9%95%B7%E6%B4%B2-r189789

長洲張記

http://www.openrice.com/zh/hongkong/r-%E9%95%B7%E6%B4%B2%E5%BC%B5%E8%A8%98-%E9%95%B7%E6%B4%B2-%E6%B8%AF%E5%BC%8F-%E7%B2%89%E9%BA%B5-%E7%B1%B3%E7%B7%9A-r7215

大家 like 咗我哋個 facebook page未呀？﹗未就快啲 like啦﹗

作者：傻夫婦一家四口生活日誌

其他文章：【傻夫婦】大頭小丸暑期班

                  【傻夫婦】「沒有起跑線」之虎媽？苦媽？