【幼稚園報名】 細B 入學有攻略
2016-10-21
最近肯定好多爸媽忙着幫小朋友報幼稚園，然而若家中的是 細B ，爸媽是否有點頭痕？到底報唔報學校好？抑或等多一年才報？若然想報又應該點做？
要釐清何謂「 細B 」，坊間有啲標準，話1至4個月為「大B」；5至8個月為「中B」；9至12個月為「 細B 」。
但幼稚園專家Fanyee（上圖）話：「唔好聽人講，最好看學校報名要求，一般是收1月1日至12月31日出生的小朋友，有個別傳統名校和一條龍學校，有其自家訂的準備，但都收到9月、10月出生的小朋友，故9月出生的又怎會是 細B ？」
雖說學校都愛收「大B」，但Fannyee透露報幼稚園時，爸媽還是留意學位的收表情況。「像今年2016年，我哋都打咗個突：有傳統名校及一條龍學校，連 細B 報名表都收，據聞是因為報名情況唔夠爆。雖然入讀成數未必高，但有機會面試，爸媽都可搏下，不妨致電心儀學校問問，話唔定有意外收穫，到時多個選擇。」
有專家建議，「 細B 」今年無法考進心儀學校，不妨先入地區學校，待提升各方面能力後，下年以「超大」身分再接再厲。又或，心儀學校願意取錄孩子讀N班，家長不妨一試，以期望有機會直升原校K1。
Fannyee指，都有家長這樣做，但要注意：「 細 B 留班再讀係硬淨啲又跟得上，但最好讓小朋友踩住個 K1去報心儀學校重讀，這較踩住個 BB 班好，起碼小朋友技能上發展理想，考學校都有着數，除非已入讀了心儀學校再轉就另計。」
「此外，父母有心理準備，留班重讀只可以喺幼稚園用一次，唔代表報小學可再用或一定得。都係嗰句：先攪掂小朋友的常規訓練，表現好的細B可能較表現不理想的大B，更有機會入到好學校。」
撰文：馮淑玲
星島圖片庫
其他文章：【幼兒面試無得輸系列】面試前怎教？