放假當然要「捐窿捐罅」四圍搵好嘢食,今個星期仲未諗到去邊好?咁就不如去葵涌運動場舉行嘅食品嘉年華啦!場內好似一個小型工展會咁,除咗有好多美食之外,仲有乾貨、小型電器、廚具用品等等,不過,電器及廚具款式價錢唔算好吸引,反而食物就好抵食,值得帶小朋友去試。
記者就去咗現場親身試食,以下6款必食!
有攤位大排長龍,原來係有鮑魚試食!$10/隻,四分一隻手掌咁大,入口夠晒腍,一啖食晒啱啱好。
攤位:華泰海產貿易有限公司(B73-74)
喜歡食羊肉同埋串燒嘅朋友請留意,呢個攤位嘅羊扒全場最抵食,可以揀辣或者唔辣,味道唔太羶,咬落去仲有肉汁架!
▲串燒沙嗲魷魚腳,$50/串
▲串燒大肉串,$20/串、$30/2串
攤位:萬朗酒業食品有限公司(C96)
近期大熱嘅芝士大啡菇,唔好睇佢相貌平平,原來一共用咗3款唔同嘅芝士整,包括拉絲芝士、車打芝士同松露芝士。大菇$30、細菇$20,即叫即焗,熱辣辣食就最好味!
攤位:味高美有限公司(C103)