11月尾啦，仲有一個月就係聖誕節，Santa Claus is coming to town!! PP太古廣場率先帶大家提早慶祝聖誕，以「Where Christmas is Made」為題，帶來聲色味俱全的感官體驗，還有多個免費工作坊，大人細路都啱玩！
由金鐘站上去LG層，就已經見到大大間玻璃屋，小朋友見到一定好開心！由12月1號開始就會有聖誕老人在玻璃屋裏面跟大家合照。爸媽們可以上L1層的專屬櫃位買飛，11號前買的話只要$80，同時可以有4人入場，最啱一家大細去影相，仲會送一張即影即有相同一包蠟燭俾大家，不過由12號開始至25號，門票就會係$110一張。時段有限，大家最好先去櫃位預訂啦。
▲屆時聖誕老人會在玻璃屋內與大家合照。
▲專屬櫃位在L1層。
大家進入玻璃屋同感官花園之前，首先要經過一道測試門。門上面有一個指標寫住「Naughty」、「Pass」同「Nice」，只要喺下面經過就會啟動，睇下你曳唔曳，最啱用嚟測試屋企隻百厭星！
過咗測試門之後就係「感官花園」啦！感官花園分為三個部分──視覺、聽覺和嗅覺。首先係視覺，今次PP同本地藝術家Shannnam合作，放置咗好多由Shannnam設計嘅迷你聖誕裝置。聖誕裝置入面有不同場景，仲有好多的骰嘅人仔，可愛得嚟又非常細緻，小朋友一定好鍾意！
第二站係聽覺區，PP揀咗好多同聖誕節有關嘅聲音，例如聖誕歌、鈴聲、火車聲，而小編最鍾意嘅係聖誕老人嘅笑聲！好似喺你耳仔邊笑咁，小朋友都一定會覺得好得意。
▲每種聲音都會有一塊提示牌，大家又估唔估到「積雪的地方」係咩聲呢？
講起聖誕節就會諗起聖誕大餐，所以嗅覺區都放咗好多食物嘅味道，包括棉花糖、朱古力、紅酒、咖啡。除咗食物之外，仲有燒柴味，感覺就好似喺火爐邊咁。
除咗大堂嘅感官花園，Shannnam設計嘅迷你聖誕裝置仲會放喺廣場嘅不同地方，有薑餅人、朱古力工廠、禮物等唔同主題。大家可以用放大鏡細睇入面嘅場景，而且亦會有唔同香包，播住相關嘅聲音，同一時間感受聖誕嘅聲色味。現場嘅小朋友都睇得好開心！
今次最大嘅賣點係有非常多免費工作坊，總共有40場，只要電郵去ppchristmas16@swireproperties.com登記就可以參加，先到先得。工作坊喺L1層嘅特別櫃位進行，分別同Shannnam、瑞典文具品牌kikki.K同埋La Maison du chocolat合作。Shannnam嘅聖誕迷你場景工作坊教大家整感官花園入面嘅迷你裝置，而kikki.K嘅聖誕紙飾品DIY工作坊就會教大家整紙藝裝飾，La Maison du chocolat嘅朱古力雕刻工作坊除咗可以免費品嚐頂級朱古力，仲可以試下整朱古力裝飾。
▲聖誕迷你場景工作坊，Shannnam會在旁指導。
PP率先俾傳媒試玩聖誕迷你場景工作坊，所有工具都已經準備好，參加者可以自己設計聖誕迷你場景，喺Shannnam指導下完成。而且工作坊會分為成人班同小童班，小編試玩嘅係成人班，整試管迷你場景，比較複雜，要用美工刀、白膠漿；而小童班就比較簡單，分別係用黏土整薑餅人加上聖誕樹裝飾，同埋用絲帶整鹿或者貓，家長可以在旁幫忙，就唔怕小朋友會整親手啦！
▲有兩款試管迷你場景，任君選擇。
除咗工作坊，唔同品牌都會喺PP設立Pop-up Shop聖誕限定店，包括比利時朱古力大師Frederic Blondeel，係香港唯一嘅實體店。
限定店除咗會賣不同朱古力禮盒之外，現場仲會有「試管即沖朱古力」，$60一支。大家可以選擇朱古力粉，再喺8種配料中揀3種，試管上面仲會有心意卡，方便大家送禮。
記者就揀咗Dreamy Belgian朱古力粉，配料就揀咗Marshmallows、Christmas Mix同埋Gingerbread Mix，只要等5-10分鐘就完成啦。放入試管後好靚，小朋友見到咁多聖誕造型嘅糖都會好開心。
日期︰2016 年 11 月 21 日至 2017 年 1 月 1 日
地點︰金鐘金鐘道88號太古廣場
網站：http://www.pacificplace.com.hk/en/happenings/Christmas%202016
查詢：2844 8988
採訪攝影：廖廸莎