【名人爸爸】張繼聰：小朋友冇得教，就係模仿你
2016-06-09
媽媽是天后級歌手，爸爸是影視界紅人，小朋友的生活一定會好特別。不過爸爸張繼聰告訴大家，「同仔仔生活其實好casual，我哋一家都經常被拍到去行商場，睇電影！係好正常嘅社交生活。」保持簡單生活，是因為他深信，最好的教育不在乎父母「教」甚麼，而是父母做甚麼。
常告訴兒子：藝人都只是一份工作
大家都想知道，張瞻有星級爸媽的生活係點？「最近有啲同學仔會叫佢媽咪做殭屍囉。」
講完笑，張繼聰就一本正經議湊仔經：「其實佢都返咗學好幾年，已經有自己嘅生活同社交圈子。不過我哋空閒時都有很多家庭樂。」他續指，「我唔會因為工作而帶來優越感或者自卑感。我成日同佢講，其他朋友仔嘅父母可能係醫生、老師，任何工作都係工作，我嘅工作都只係一份工作。」
話雖如此，分別是這對父母特別忙，「所以相處時間嘅『質』好重要。」張瞻喜歡踢波，廿四孝父親就帶他上足球班，和他一起練習。「踢波是好傳統、好男人的活動。」說起上來，流露陣陣bromance（男人的浪漫）。
▲夫婦盡量保持正常社交生活，不希望對兒子的成長造成困擾
▲張繼聰經常工作至凌晨四、五點，張瞻上學前極速換校服，就是為了擁著爸爸睡5分鐘（網上圖片）
▲張繼聰和兒子的活動不少與運動有關，去年全家曾公開觀看籃球比賽（網上圖片）
為妻出頭 不願兒子在壞風氣中成長
近日太太謝安琪停下休息，做老公的變相要花更多時間工作，張繼聰好man咁講，「其實好多家庭都係爸爸工作養家，都係咁樣，所以冇問題。」張繼聰的man幾乎全香港都能見證，早前他就網民對老婆的批評而「回禮」力撐，「我相信無論丈夫、太太都好，見到另一半被無理取鬧時，都會有咁嘅反應。」
他並不希望兒子會活在壞風氣之中，「現今社會，好多人喺網上發表意見時… 可能冇責任，會任意發言，或者唔尊重人。我哋嘅下一代正正活喺網上、活喺呢個風氣之中。我純粹唔想個仔覺得呢件事好正常。當大家都覺得好正常嘅時候，其實係好有問題。」
張繼聰坦言，他甚少刻意教張瞻甚麼，「我覺得小朋友係冇得教嘅，佢就係模仿你。我認為大部分大人敎小朋友嘅嘢，都係自己做唔到。所以，自己做不到嘅話，小朋友都一定學唔嚟。我認為，個仔係我同太太嘅混合！」咁到底張瞻同自己有咩相似之處？「都係搞搞笑笑咁囉！」張繼聰形容兒子鬼馬、從容，相信遺傳身教同樣有影響。
▲張繼聰希望提醒大眾要為自己的網上言論負責任（網上圖片）
▲張繼聰每次上載兒時拍劇片段或照片，都獲網民大讚與張瞻一樣可愛。（網上截圖）
▲張瞻也會怕被爸爸的鬚根拮親，但每當見到爸爸剃鬚後又會笑他古怪。