×

Home

爸媽Junior文章打印

來自網址: http://www.ohpama.com/?p=137508

生仔大計 December 16, 2016

【晴朗天】懷孕日記・晴朗在肚子裡的十個月

懷胎十月,係每個媽媽最期待,或者係最回味嘅事情。回想起晴朗響我肚裡面嘅時間,會因身體變化帶來嘅不適而感到困苦,但又會為BB在肚內一天一天長大而滿心歡喜。期待BB來臨嘅日子,真係百般滋味在心頭。就等我回一回帶,同大家分享一下懷孕過程。對於正準備懷孕或正在懷孕中嘅媽媽可以作多個參考呀!

一切就從一支驗孕棒開始…

**由於以下落嚟嘅記錄包括咗兩胎嘅經歷,我會將陀住朗朗(哥哥,2010年出生,現時6歲7個月)嘅回憶highlight為藍色,而晴晴(妹妹,2012年出生,現時4歲10個月)嘅就用粉紅色標示。等大家睇得容易啲啦!^^

科技先進,而家驗孕棒已經發展到電子化喇!仲記得懷著晴晴嘅時候,懷孕兩週六天已經可以測試得到結果。驗孕棒上顯示我已經懷孕約3週,又真係幾準喎!大家可以記低「Clearblue」呢個牌子,我係響萬寧買㗎!屈臣氏或便利店都有售,唔難搵~

~懷孕第4週~

好多時都聽到有啲大肚媽媽會投訴坐車冇人讓座。但就係好邪!唔知係咪因為我著得比較鬆身嘅關係,未見肚就已經有人讓座畀我。不過都好多謝果位有心人士…大家如果見到大肚婆都記得要讓位喇!^o^

~懷孕第6週~

老公知道我「恨」生女「恨」到暈,所以送咗份小禮物畀我。粉紅色嘅bb襪仔,襯晒囡囡啦!


口味開始會有轉變。陀梗朗朗嘅時候,去親飲茶都好鍾意食鳳爪,但以前我唔會食㗎!亦都唔會食麥記、杯麵、公仔麵等冇益食物。但竟然食得多咗,仲成日心思思又想再食添!(陀仔比較鍾意食咸嘢,又鍾意香口嘅食物)


到陀晴晴果陣,調番轉好鍾意食酸辣米線,又鍾意食糖、朱古力之類。慘喇!仲唔肥屎我?(陀女較偏向酸、辣、甜嘅味道)


懷孕初期,每星期都會去兩次糖水舖飲桑記生蛋茶,可以有助安胎。搵啲舊式啲嘅糖水舖就有㗎喇!

~懷孕第7週~

響eBay訂咗部胎心機番嚟!咁就可以時時刻刻聽到bb心跳聲啦!不過太早聽唔到,唔好自己嚇自己,大概要16-20週先會聽得清楚啲~


第一次去私家度照超聲波,扁扁哋膸圓形果個係胎囊,即係bb住嘅屋企。圓形果點係營養球,作用係為bb提供營養架!


Zoom近啲個胎囊畀大家睇下,見唔見到晴晴呀?XD


好模糊果個影就係晴晴喇!醫生正量度梗佢嘅長度~

~懷孕第8週~

第1次同朗朗接觸係響第8週,黑色腰豆形呢個就係胎囊喇!


胎囊裡面有一忽白色嘅影,係朗朗嚟呀!有1.55cm長~


仲記得懷孕初期成日估bb係仔定女,所以都上網搵過一啲資料。資料顯示可以從7至10週嘅超聲波圖片估計出bb性別,方法係睇bb嘅胎囊形狀。如果胎囊長並呈腰豆狀就多數係仔,朗朗果幅超聲波又真係好似腰豆喎!如果較為圓扁型就係女,晴晴果幅的確唔似腰豆,係圓圓哋扁扁哋咁嘅~ 呢個方法幾有趣,但當然未經醫學證實啦!不過對於心急想知道係仔定女嘅媽媽嚟講,不仿參考一下~^^

~懷孕第10週~

同老公行開汽車用品店一齊揀咗呢個裝飾掛響車度。車出車入都好似向全世界說「我升呢成為大肚媽媽喇!」~ XD


陀住晴晴第一次去健康院產檢,已經聽到胎心聲。健康院啲聽胎心儀器唔同私家果啲咁先進,一般冇咁快聽到,朗朗果陣都冇咁早。可能係第二胎嘅關係啦!當刻我同老公邊聽邊笑好開心呀!

~懷孕第11週~

第2次同朗朗接觸,今次開始聽到心跳聲喇!強而有力嘅節拍!


朗朗大個咗好多,上次先得1.55cm,今次有4.24cm喇!


我問醫生bb幾時先會識得郁架?醫生話bb瞓梗覺zZzz…跟住醫生郁下我個肚,嘗試叫醒朗朗,真係醒咗喎!仲腳仔踢踢添!好精靈活潑呀!


呢個表係mark住每日嘔嘅次數,由第8週開始嘔到而家。食咩嘔咩,嘔咗成個月真係有啲辛苦!相反陀住晴晴嘅時候有時係個胃頂住好辛苦,頂到好多胃氣,勁想嘔!但最終未嘔過。可能呢啲就係陀仔同女嘅分別啦!


其實嘔都好需要能量,空肚嘔仲辛苦。呢啲就係陪住我渡過嘔吐期嘅食物,寶礦力沖劑加溫水開嚟飲,感覺真係會好啲㗎!

~懷孕第12週~

第一次半夜三間3點幾嚟食杯麵,冇辦法!瞓瞓下覺真係好肚餓,bb都好大食喎!XD


將有咗嘅消息通知公司,啲同事都戥我開心呀!仲走晒過嚟恭喜我,成朝都忙過不停接收祝賀。咁開心!下晝一於萬歲啦!


陀晴晴嘅時候都有在宣佈喜訊後請下午茶,仲試咗sift出品嘅蛋糕同macaroon添!冇令大家失望,好好味呀!


要開始搽肚紋膏喇!唔知關唔關事,我個肚生完bb後真係冇咩肚紋,仲見得人喎!想要靚真係唔懶得㗎!

~懷孕第13週~

去威爾斯進行唐氏綜合症檢查(OSCAR),即係度下bb頸皮嘅厚度來估計bb患唐氏綜合症嘅機會率。估唔到朗朗又大個咗咁多,上次4.24cm,今次有7.46cm喇!等咗差不多兩個鐘,終於有結果。結果顯示朗朗患唐氏嘅機會很微,又過一關喇!yeah~

~懷孕第15週~

陀住晴晴第一次有人讓座畀我,第二胎真係會快啲現肚呀!咁快被人label咗係大肚婆~ XD

~懷孕第16週~

又同晴晴有個約會喇!照超聲波嘅時候,醫生話八九成似係女。佢zoom近bb果度同我數有三劃,係女仔生殖器官嘅最初形。走果陣仲提我可以開始買定啲bb女衫添!睇嚟醫生都好有把握喎!終於可以有機會一嘗幫囡囡扮靚嘅超大欲望,唔駛再「恨」人哋「恨」到口水流。真係堅開心!^o^


平時行百貨公司嬰兒部見到啲女仔衫真係好「恨」呀!而家有機會可以買喇!果種期待同興奮嘅感覺真係超正!yeah~


婚後一直打算將啲金器留番畀第時個女,估唔到真係可以成真喎!興奮嘅感覺維持咗好一段時間~


人地話結婚可以令妳成為一日嘅公主,陀bb可以令妳成為十個月嘅皇后。有咗bb特別感覺到身邊所有人嘅關心同愛護,感覺好幸福呀!

~懷孕第17週~

仲記得陀住朗朗果陣,第一次照超聲波照到bb性別,我不得不接受呢個事實,bb係有何b仔架!嗚~ 聽到果一刻的確係有啲失望。不過醫生話各樣都好好,朗朗有半磅,真係快高長大。其實健康先係最重要,仔定女都已經唔緊要喇!


第一次從網上見到呢幅相嘅時候,印像好深刻。上星期見醫生果陣,話我好快就會感覺到胎動。好興奮呀!之後成日都摸下個肚,感覺下朗朗幾時會踢我。但仲未有感應,好期待呢!

~懷孕第20週~

胎動喇!突然感覺個肚有嘢郁,好似有條金魚響裡面彈下彈下,彈咗我幾下咁。終於感覺到胎動喇!開心到笑咗出嚟!不過第一胎係會遲少少,陀晴晴果陣18週就已經胎動喇!


買咗部胎教機,聽聞用咗佢,bb出世後係會比較聰明、富想像力同埋情緒穩定啲。每次箍住佢響個肚,開機會播出不同節拍,朗朗就響我肚裡面好活躍咁踢,感覺都幾開心!不過有冇用就見人見智。如果話朗朗聰明同富想像力都尚可以,但情緒穩定呢part好有保留。佢係一個極度難湊嘅bb,起身又喊、瞓瞓下醒咗又喊、抱住都可以喊。總之就係好難頂啦!其實感覺好似冇咩用,而且再冇咁多恆心每晚使用,所以陀晴晴果陣冇用過喇!反而晴晴好湊好多,點解會咁嘅呢?唔用仲好~@@"‘

~懷孕第21週~

網上bid咗啲bb音樂CD,一開始聽,朗朗就顯得好活躍,不停咁踢我。睇黎好鍾意聽音樂咁播!


照超聲波好明顯見到晴晴隻手仔,好似同我哋say hello咁呀!哈哈!


連隻臭腳都照得好清楚,kawaii呢~


側面輪廓似爸爸多啲喎!


響肚入面已經動作多多喇!睇下佢個托腮樣,好似沈思梗咁~


睇睇下仲要令轉面,好似怕睇蝕咗佢咁呀!XD

~懷孕第22週~

陀女中期口味又轉變到好鍾意食西餅、蛋糕,每日都要食過至安樂。陀女嘅口味就係我致肥嘅原因喇!…@.@

~懷孕第23週~

不過好彩番健康院嘅時候,姑娘話我keep個磅數keep得幾好。仲記得陀住朗朗果陣諗住大肚都必定肥㗎啦!就不停食,搞到有埋姙娠糖尿。第二胎就醒喇!唔好咁放縱,要繼續努力呀!yeah~ ^^V

~懷孕第24週~

踏入BB腦部開始發展嘅階段,要食魚油丸喇!我響萬寧買,兩胎都有食,其實唔知有冇效,但食咗感覺會良好啲~ XD

~懷孕第25週~

今次照晴晴嘅時候,佢「mark」大個口仔,好似想講嘢咁呀!


跟住仲識得同我哋笑添!睇到我哋好興奮。每次照超聲波之前都會超級期待㗎!

~懷孕第26週~

距離朗朗出世大概仲有3個月,係時候開始買下啲bb嘢喇!買咗啲衫仔、和尚袍、包被同grobag。大滿足呀!

~懷孕第27週~

會展同吉之島都做梗bb展,精明一族就梗係襯低吸納啦!買咗4個十字咀嘅奶樽、奶樽消毒液、消毒奶煲(送4個奶樽)、奶粉格、bb濕紙巾、沫咀仔濕紙巾同埋奶樽刷+奶咀刷。晴朗爸爸又一頸血喇!XD


見質料幾好,又去吉之島買多兩套和尚袍,仲有帽仔同手套、腳套仔添!


人哋話大肚婆運氣特別旺,不嬲冇抽獎運嘅我,竟然響公司Annual Dinner抽中頭獎喎!有$2500 CASH~ wow~ hoo~~ *o* 母憑子貴,陀仔真係特別旺!


我哋家有養狗狗,係時候要畀狗狗熟習下屋企多個新成員喇!務求認真實習,買咗個bb公仔番嚟!拍下佢會識得不停咁笑,不時抱下佢、扮下餵奶、同bb玩下。多啲呢啲動作同埋響起bb嘅聲音,希望幫狗狗早啲習慣一下屋企多個bb嘅生活~


又到超聲波時間,今次同朗朗照4D,可以望到朗朗個樣清楚啲。見到佢有個大鼻同大咀,睇嚟似爸爸多啲喎!仲食梗手指添!好得意呀!


照照下朗朗用兩隻手摭到實一實,唔通呢個係怕醜仔嚟嘅?

~懷孕第28週~

襯住吉之島大減價未完,諗到爭啲咩又走去入貨。今次買咗bb洗衣粉、沖涼液、洗頭水、洗奶樽液、爽身粉盒、爽身粉同埋兩對襪仔。又放血喇!XD


護協買嘢都好平㗎!買咗bb專用清潔綿、尿墊、綿花球、指甲鉗、奶咀鏈、棉花棒、鼻孔清潔器、bb油、安心假奶咀、餵奶面巾同紗巾。新成員加入真係要買好多嘢呀!

~懷孕第29週~

第二胎個肚真係大得快,一般32週後個肚先夠大去studio影相,29週就已經籮咁大喇!


響淘寶訂咗啲靚靚口水肩同埋幾條公仔吸汗巾,仲有一啲紗巾同餵奶巾添!我都係生bb先識玩淘寶㗎咋!XD

~懷孕第30週~

陀女後期口味又變得好鍾意食雪糕,尤其係Haagen-Dazs既double chocolate三文治,簡直係每餐飯後都想食呀!


得閒就要執定「走佬袋」,預備隨時生得果陣就快手快腳拎入院丫嘛!一早準備好,總好過臨急抱佛腳啦!第一胎係咩都緊張啲,第二胎36週先走去執。好彩果陣未生得咋!

~懷孕第31週~

適逢吉之島聖誕8折大減價,要開始入定晴晴啲必需品喇!第二胎買嘅嘢少好多~

~懷孕第32週~

行千色店買左呢樣嘢,據聞用咗可以將洗衣機清潔得乾乾淨淨。之後就可以洗晒朗朗啲衫仔同被鋪喇!


我哋屋企係頂揭式洗衣機,所以跟住3號嘅指引去做就可以將洗衣機徹底清潔。用過先知原來用開果部洗衣機係咁污糟㗎!大家都不仿買嚟用下,洗乾淨先去洗啲bb衫仔啦!

~懷孕第33週~

今次晴晴摭住塊面仔扮怕羞妹,睇唔到佢個樣添!不過好開心,醫生話已經有4磅8喇!


朋友送贈嘅揹帶,係我鍾意嘅款式,相信朗朗都會鍾意啫!


啲牙肉痕痕癢癢,懷孕後期係需要補充多啲鈣。睇黎每日一支鮮奶已經唔夠,要加碼先得喇!

~懷孕第34週~

中醫角度嚟講,好多被稱為涼嘅糖水,在懷孕初期禁止食用。好似話太涼會影響胎兒喎!但懷孕後期可以開始食番,仲有清胎毒功效添!實在太開心喇!好耐冇食過lu~ 我開始每星期自製一款糖水,整過腐竹雞蛋糖水、芝麻糊同埋綠豆沙,每日仲有新鮮即磨低糖豆漿。下星期試下整冰糖雪耳木瓜糖水先~


終於將朗朗啲衫仔、手套、腳套、襪仔、床單、被鋪、面巾、浴巾、紗巾…全部都洗好晒喇!


為咗朗朗而買嘅4格櫃筒塞到爆滿,自己買嘅衫仔+姑奶送嘅都已經霸佔咗兩格,仲多衫過我自己呀!


據聞白蓮鬚對清胎毒好有功效,唔知關唔關事,晴朗出世後冇咩皮膚上嘅問題。由30週起,每星期飲兩日,每日兩碗。去一般藥材舖就可以買得到白蓮鬚,我買一兩可以煲兩次。加啲冰糖同雞蛋就煲好,好easy!網上都有好多白蓮鬚食譜,大家不仿search下。不過亦有人話白蓮鬚較寒涼,唔係個個孕婦都適合。食之前最好向中醫查詢,咁就食得至安心啦!

~懷孕第35週~

人哋話大咗肚嘅女人特別靚,但我就覺得"I am too FAT"~ 不過一生人冇乜幾多次大肚,即管去留一留倩影啦!


之前響吉之島買嘅bb浴盤送咗嚟!可以模擬一下幫bb沖白白喇!


世上只有媽媽好!媽媽為我預備咗啲薑皮,等我生完bb可以用嚟煲薑水沖涼。好窩心呀!

~懷孕第36週~

聽其他媽媽講呢款茶包對上奶好有用,第一胎果陣我係一個唔夠奶嘅窮媽,人奶+奶粉餵咗一年。為第二胎做足準備,期望可以成為全人奶媽媽。生完晴晴之後,響醫院已經立即開始沖嚟飲喇!結果真係如我所願做咗全人奶媽媽。不過我又覺得未必關茶包事,都係密密埋身餵bb,勤力啲仲實際啦!


為避免狗狗啲毛毛影響初生嘅朗朗,去吉之島買咗個門欄番嚟裝響睡房,狗狗要開始習慣出廳訓喇!乖~ 就嚟做人家姐,媽媽一樣咁錫妳架!^^

~懷孕第37週~

坐月子媽媽飲用一般凍滾水係會寒涼,對身體唔好架!晴朗爸爸特別為我炒咗啲米,用嚟整炒米水飲。好易整!慢火將啲米放入白鑊炒,變金黃色就完成。我兩次坐月都係飲炒米水,傳統嘅嘢跟咗冇壞嘅~


保溫壺都預備好!咁我一生完bb就有炒米水飲啦!做法好簡單,將一湯匙嘅炒米加入去一大壺滾水度焗。鍾意嘅仲可以加啲桂圓肉,焗大約10-15分鐘就飲得㗎喇!


適逢母親節,去油站入油嘅時候,職員見我大肚送咗一朵用毛巾製成嘅康乃馨。仲同我講咗聲「母親節快樂」添!第一次有人咁同我講,唔係好慣,但好開心呀!


奶奶嚟我屋企食飯嘅時候,代朗朗送咗束鮮花畀我。快將做人媽媽嘅感覺越來越強烈喇!


奶奶煮咗兩個月嘅薑醋已經進入尾聲,十二朝過後就可以派畀親朋戚友食。聽奶奶講,先煲薑煲個令兩個月,預產期之前約20日落雞蛋(烚好去殼),等生咗bb之後一星期先落豬腳。我奶奶仲會落啲晴朗爸爸喜愛嘅雞腳,好好味㗎!另外,又會落埋咸蛋添!咸蛋(連殼)煮一兩日後就食得,味道會變咗甜蛋,好特別㗎!大家都可以試試丫!^^

~懷孕第38週~

啲床單被鋪洗乾淨同晾乾晒!搞掂好朗朗張床仔喇!


買咗第一件玩具畀朗朗,番到屋企已經急不及待要裝好佢。話咁快就裝好咗!係有天花燈光投射、音樂同埋公仔轉動嘅玩具呀!咁先似番張bb床加嘛!

~懷孕第39週~

購自永安大減價嘅BB車都送咗嚟喇!放埋bb公仔咁推出街,啲人會唔會以為我傻㗎?XD

~BB出世喇~

朗朗在40週零1日順利旦生


晴晴在38週零5日順利旦生,第二胎真係咩都早啲~ ^^"‘

 

祝預備懷孕或正在懷孕中嘅媽媽好孕!生個肥肥白白、健健康康嘅bb出來喔~

你或者會有興趣睇埋我生晴朗嘅過程,可到以下網址重溫!^^
朗朗的旦生http://blog.xuite.net/chinglongtin/blog/442307534
晴晴的旦生http://blog.xuite.net/chinglongtin/blog/444117262

晴朗 食·玩·育·美·愛の親子平台
facebook專頁:https://www.facebook.com/happytrain123
blog:http://blog.xuite.net/chinglongtin/blog