【阿爺廚房】李家鼎：愛在心裏口難開

最近火紅的《阿爺廚房》，觀眾對主持人之一李家鼎（鼎爺）的廚藝讚口不絕。鼎爺謙稱全靠嚴父出高徒，但表示兩個仔對煮嘢食完全無興趣，亦不會強迫他們，貫徹鼎爺無為而治的教育方針。

鼎爺的刀功及廚藝被賞識，今年台慶夜就由他負責百幾隻雞翼，又要炒糯米，整足成日，他說整到手軟。

《阿爺廚房》讓觀眾見識了鼎爺柔情的一面。

凡事盡力而為

揸大關刀叻，拎菜刀亦是有板有眼。鼎爺話：「年輕時老竇叫我學，當時睇見廚房有人切嘢，有一種人哋得點解自己唔得嘅諗法，咪試下囉。」更重要的，其實是鼎爺的爸爸非常嚴格，自己煮一次做示範，下次就要鼎爺煮。「最驚見到老竇食一啖就放低筷子，嚇到鼻哥窿都無肉。」

生於廣州一個富裕家庭的鼎爺，八歲時經歷土改，所有家當被充公後，與家人逃難來港，因家貧被迫於小學時輟學，開始在社會上打滾。十八歲時，認識了關正良教頭，拜其為師並開始習武，習過太極拳、詠春拳。二十歲起擔當龍虎武師。「我份人做嘢好認真，凡事盡力而為。」

年輕時的鼎爺

為工作捨家庭

四十年的武師生涯，行內聞名，另教授馬術多年，連陳慧琳都曾經跟他學騎馬，亦曾勇奪超過二百個冠軍，包括世界知名的「IBG國際商務馬術賽」及「FEI國際馬聯馬術障礙賽」等大賽。

多年來一直於無綫電視擔任演員及武術暨馬術指導。

做龍虎武師非常辛苦，工時長，又要就廠期，笑言片場就係屋企，所以鼎爺不諱言自己好少時間陪兩個仔。「記得佢哋細個話鍾意食我煮嘅嘢，咪盡量一星期煮一次俾佢哋食，煲吓雞湯，蒸吓魚，食到佢哋快高長大。做呢行，好難有乜嘢親子生活，唔使開飯咩？做到幾多得幾多啦！」

兒子兩歲鼎爺便開始教授馬術，現時李泳豪主力鑽研賽車。

兩個寶貝仔泳漢及泳豪是八十年代有名的童星，自五歲開始已於幕前演出。對於年紀稍長的讀者，可能記得鼎爺曾經於《香港八幾》飾演喺銀禧小食店工作的伙計，嗰陣TVB仲喺廣播道，鼎爺每日兩點幾就去湊孖仔放學，然後帶佢哋入廠睇自己拍戲。「佢哋兩個根本喺個廠大，成日同啲藝人仲有crew玩。」九十年代，鼎爺同施明離婚。李泳豪曾經在一個訪問表示，爹哋媽咪處理離婚呢件事，處理得好好，因此並沒有影響一家感情。鼎爺豪氣地說：「相處唔到就離婚囉（是否不能再見亦是朋友？）做戲咩？咁大個人！見到咪見，完全無尷尬。」

70年代，李家鼎認識藝人施明，拍拖四年結婚，多年後離異。二人的孿生子李泳豪(右)、李泳漢(左)，自小擔當童星，曾演出多部電影及電視劇。

含飴弄孫？隨緣啦！

李泳漢同李泳豪後來去咗美國讀high school，回港後泳豪就開始拍電影，又再簽TVB做合約藝員。最為人知，當然係同思琦妹拍拖。提起呢件事，鼎爺仍然火氣十足，還記得他第一個站出來撐住個仔。坊間有傳泳漢與父失和，因此今年一月與圈外女友嚴佩鈺（Conny）結婚，並於6月誕下兒子李浩榮（Alfie），鼎爺、施明及兩個仔的互動即成為百日宴上的焦點。「兩父子有乜嘢啫，最緊要個孫平平安安，身體健康，老人家都係望呢d。」

孫兒Alfie肥嘟嘟，眼仔睩睩無扭計。

看似隨便的鼎爺，對兩個仔其實都好上心。年過七十，生活仍然忙碌，最近忙於錄影《阿爺廚房》，他說在台慶煮百幾隻雞翼，又要炒糯米，手都軟。「呢幾個月見得細仔兩次，佢有問我大嫂需要補身嘅食譜，我咪話佢知囉！中國人鍾意百子千孫，但家下時勢麻麻，隨緣啦！後生開心就得。」鼎爺最近紅到開巷，有沒有想過何時退休？他強調：「我要拍到唔郁得，退休好悶，拍劇日日唔同環境，時間易打發好多。（咁會唔會教個孫耍功夫？）唔好啦啩？我七十幾啦，太大動作骨頭會散啊！普通強身健體嘅健身操啦！」

李泳豪在微博分享鼎爺學習用平板電腦的照片。

撰文：吳一心

圖片：被訪者微博、星島圖片庫