【傑。斯與晴】回顧--小JM降臨＠QM生產記

轉眼間，小JM已經十個月啦。。。

間中睇返相都會諗起當日小JM出世既情境，

真係又痛又開心。。。

時間過得太快了，

而家嘅小JM已經識爬識企，仲會學大人講嘢添，

真係唔捨得小JM長大得太快，

媽咪真係怕你有一日會唔再依賴我

21-2-2016

21 號一瞓醒嗰陣已經成個人好唔舒服，好滾，成個人都發熱，

老公幫我用耳探來探過，Check到發燒，

於是都係決定去睇醫生，

但就唔係睇西醫，而係去睇中醫，感覺上好似安全D同放心D

去到診所等咗一陣就見醫生，

醫生一把脈就好快check到BB性別，

仲同我哋分享佢太太最近都陀B，仲要係孖女添 

醫生好細心咁檢查完就話我唔似係感親，應該係俾人傳染到

的確，最近公司有同事病咗。。。

醫生就開咗兩日藥俾我，都係比較溫和嘅藥，話要靠我自己同病菌打仗

好啦，咁我唯有努力下啦！

終於睇完醫生，

老公都可以放心啲，返到屋企佢就負責煲粥我食，我就負責休息 

就係咁我由晏晝瞓到夜晚食晚飯，

食完沖咗個涼又好似真係精神咗，

嗰陣都只不過係飲咗一劑藥咁大把咋，

感覺好似有啲用

咁就諗住應該聽朝瞓醒會無事，

一心準備返多一兩日就放產假，準備同老公去慶祝生日兼食好嘢，

點知。。。

到半夜兩點左右我突然覺得個人好滾，熱到好辛苦，

又怕郁來郁去整醒老公，

於是諗住起身洗面同搵退熱貼，

當我貼左幾塊退熱係身同額頭之後，

我以為會舒服啲，

點知都只係好得一陣，

個人依然係好熱，

所以決定再洗個面去埋toilet再試下訓

驚嚇既事就來啦。。。

就係我去完toilet抹完想沖廁個陣見到個廁所係 “紅色”，

我先先係呆左幾秒，再諗係咪即係見紅，

之後抹一抹面再入房叫醒老公。

老公一聽到我叫佢就彈咗起身，

叫我即時換衫同沖涼，但係下一秒佢就話： 

咦？唔係喎，你啱啱沖完無耐咋喎，都係快啲換衫啦，唔好沖啦，唔係一陣我怕你整親呀，你又唔舒服 

我換緊衫嗰陣已經聽到老公叫醒姐姐拎走佬袋俾佢，

同向老爺奶奶講聲

到我ready出門口嗰陣老公就飛快咁帶住我去截的士，

今次好快截到，比起上次 “狼來了” 易好多，

但去到QM附近竟然見到Road Block，

好彩我哋無被截  

一去到QM就直上K9南產前房，

經過上次之後老公就好熟手，

知道要去登記，

登記完佢都知道今次有排等啦。。。因為預計臭豬B好快就會降臨

同上次一樣，

攪好晒手續之後老公只可以喺出面等，

而我就要駁機Check BB心跳同宮縮

老公雖然心急，但依然記得幫我買水同蛋糕，

如果唔係，我呢個為食貓一定好肚餓。。。

係我駁機嘅時候都分別有幾位準媽媽入院，

有啲係見紅，有啲係穿水。。。

同樣準爸爸們都表現得好緊張 

終於喺3點幾4點攪掂晒啲嘢，

可以出外面見一見老公，

見到老公又緊張又擔心又攰個樣真係辛苦晒佢，

已經照顧咗我成日，

到而家半夜都仲要挨眼瞓等我，

我唔係好忍心見到老公咁攰，

而我又未生得嘅情況下，

我決定叫老公返屋企唞下先再返工

而我就乖乖地咁返去張牀度攤下，

因為真係瞓唔著又有啲緊張，

所以都真係幾掛住老公喺身邊嘅Moment。。。

幾經辛苦終於挨過咗呢個moment，

6點左右就開始有嬸嬸同姑娘來量體溫同血壓

7點左右就派餐，而我所食嘅就係一碗 “肉碎粥”

食咗一半度，就有姑娘來通知我同另外幾位媽媽要去做 “開鉗” 檢查

（一聽到就知唔係好嘢來啦！即係又要放隻鴨嘴入去check）

未check都無事，一check，真係痛到不得了，真係想殺人。。。

醫生check完之後就話俾我知我係見紅同穿咗水，要決定到底催唔催生

＊＊穿咗水後最好24小時內生產，否則會增加胎兒嘅感染率＊＊

因為我唔知點揀好，姑娘就叫我打俾老公商量，

點知老公都係叫我自己揀

於是我就問姑娘催生同唔催生嘅分別：

1.）催生： 會即時種豆喺手度落催生藥，每4個鐘會check一次宮頸度數

                  （注意： 種咗痘落咗藥就唔食得嘢架啦  所以我只靠個半碗粥來生）

2.）唔催生： 會俾多24小時你自己生，即係自然作動咁個啲，會痛啲囉，因為會耐咗；

                         如果過咗24小時都未有反應嘅話都一樣係要催生

聽完又係度諗： 

“咦，好似催生好啲，唔使痛多日，同埋如果BB今日出世咪唔會同老公同日生日囉”

（因為老公個奶奶話唔好同日喎  雖然唔知點解）

於是姑娘就叫我通知老公，

但係我個電話已經被沒收咗（有姑娘幫我執好同keep晒D嘢），

所以姑娘就借電話俾我通知老公，

係我打俾老公嗰陣姑娘就幫我開始種痘，

叫我同老公講來到直接過 產房 搵我就得啦喎 

（咦，咁又幾好喎，可以早啲見到老公 ）

十點零鐘去到產房，個人仲未係好緊張，只係覺得好攰

助產士姐姐好好人，知我落咗藥同尋晚無點休息過，所以幫我較暗咗啲燈光叫我休息下

係老公未來到之前，

我就係產房好Realx咁聽住音樂望住個海咁等藥力發作。。。

老公好快就飛的過到來我身邊

真係好多謝老公願意陪產

（其實我都怕我生個陣發癲個樣俾老公見到，但最後老公話我都算okay ）

因為老公同我都好攰，

所以係間咁暗又播住咁柔和音樂嘅房度我哋都好快咁恰咗一陣

瞓醒咗我地仲講咗陣笑添

老公一路陪我，陪到2點半有助產士來檢查，（即係吊左藥4個鐘）

Check完發覺宮頸都只係開咗兩度，

仲話至少要多6-8個鐘先開晒，

個下我都O咗嘴。。。（6-8個鐘。。。真係滴汗 ）

於是助產使就幫我加大少少啲藥力，同時又叫我不如落牀坐生產球或者行下，對加快產程有幫助

我都同意咗，而老公就喺側邊陪住同扶住我，

助產士仲教老公點用個止痛嘅電子脈衝機，（個名係咪咁叫？真係唔記得）

坐咗半個鐘左右，我見到都3點，加上頭先檢查過話無咁快生得，

所以我叫老公不如落去食嘢先

 （因為我都怕佢餓親 ）

就係老公落咗去食Lunch嘅時候，我嘅惡夢就來啦。。。

老公落咗去唔夠半個鐘我開始 Feel 到子宮收縮得勁咗同痛咗，

開頭都仲忍到，可以用止痛機頂住，

但之後嘅痛愈來愈勁，（部止痛機較到盡都止唔到痛啦已經。。。）

但助產士咁啱又行開咗，

而我又真係痛到不之得了， （痛到叫咗一句： 唔得啦！  跟住按鐘叫人來）

有個助產嘅嬸嬸入咗來，

見到我痛到好辛苦就幫我掃背，

掃咗一陣係舒服返啲，

但唔夠一陣就痛過，

嬸嬸見我咁辛苦就叫我不如上返牀，

再叫人來檢查

係等緊人來檢查嗰陣，

嬸嬸曾經游說我打 “無痛”，

但正正因為我知道 “無痛” 對大同細都有副作用，所以我堅決拒絕！

（突然覺得上產前班原來都有啲用，因為可以增長知識  ，唔使誤信而挨多針）

另外，嬸嬸知道我老公落咗去食嘢，

所以就幫我call老公返來

當我係牀上面痛到不得了嗰陣，

嬸嬸俾咗個枕頭我夾住，

叫我扮蝦米，

嬸嬸就幫我掃背來安撫我，

直到負責嘅助產使姐姐返來。

幫我準備接生嘅助產使姐姐食完飯返咗來，

一來就幫我檢查，原來已經開到 8 度，可以準備生得！

係呢個moment間產房即時變得好熱鬧，

因為多咗幾個幫手嘅嬸嬸同姑娘，

而老公亦好快咁換好衫返來陪產

當全世界都ready嘅時候，

助產姐姐亦開始 “落指示” 準備叫我點樣PUSH，

但其實我根本聽唔入耳，

只係靠老公喺耳邊再重複指令同安撫，

其間我亦做咗兩次危險動作 －－》PAT PAT離牀

助產姐姐好快就Stop咗我，叫我冷靜 

（因為怕一個唔覺意我用咗力而PatPat又離牀既話好易跌咗個B出來，咁就好危險同牙煙架啦～）

因為太痛同想快啲生完，

所以全程無用笑氣，

一聽到指令就不停PUSH，

PUSH咗唔夠幾下，

助產士就話已經見到BB嘅頭髮，

叫我努力啲。。。

好快半個鐘度 小JM 就降臨呢個世界啦 

原來生完出來嗰下真係會好感動，

特別係當BB伏喺胸口嗰陣，

嗰陣有種不其然想喊嘅感覺

突然好似有種感覺話俾我知： 你已經做咗媽媽啦！

當所有嘢都okay晒之後，

助產士姐姐同我講我無傷口，只係擦傷少少，唔使縫針

嗰下就真係鬆咗一口氣，因為我真係好怕痛

助產士話會俾BB同我哋相處兩個鐘左右先推我上房，

而 小JM 就要去兒科，因為出世前照到腸有光影，

所以要去一去兒科，如果無問題就會第二日返我身邊 

（一出世就要同BB分開，真係有啲唔捨得 ）

到我返到落產後房嗰陣，突然好自然咁摸咗個肚一下，

個下先醒起BB出咗世，唔再喺我肚入面，

個種感覺真係好奇怪 

為咗BB嘅健康著想，

我決定咗要餵人奶，

雖然會辛苦，同埋會有人反對，但我都唔理，

我會盡我最大嘅努力去做到最好！

同時我亦要多謝老公喺我身邊支持我呢個決定啦 

小JM, 

初次見面，我係媽媽呀。。。

多多指教，我哋3個一齊努力啦！

** 

有樣嘢好神奇

就係明明未生之前發緊燒架嘛，

到我生得個陣又退咗，所以無咁辛苦，

但生完之後個晚又燒過。。。

**

題外話： 

無痛妢娩 係咩？

其實係會係背脊度注射麻醉藥，以減輕陣痛帶來嘅痛楚以達至紓緩嘅效用

但另一方面亦帶來一啲副作用，就好似： 

－ 延長產程： 

    使用無痛後，需要於生產前兩小時停藥先可以再生產，因為怕會唔夠力PUSH

－有機會出現休克

－有機會引致小便，背脊及頭痛問題

－有機會影響BB嘅呼吸功能

 作者：傑。斯與晴