【LKY的慢活生活】在西貢的另一個灣仔,尋找香港的馬爾代夫
2017-01-10
灣仔呢個地方大家應該唔太陌生,但如果係西貢嗰個呢?
今次筆者就介紹一條合家歡路線,上至大人下至狗仔一齊行都得!
如果想露營,灣仔亦有南營地同北營地可以選擇。
喺未開始介紹路線之前,想介紹一間筆者好鍾意去食嘅餐廳俾大家,間餐廳叫「金雞」。
聽個名都知出名無骨海南雞飯,一個套餐大概五六十蚊,已經包咗湯同嘢飲。
個湯仲要好好飲,筆者絕對要推介一下。
入正題,食完我哋喺西貢碼頭搭七號小巴到海下。
坐到總站,就會到海下。筆者咁啱嗰日遇上好天氣。
落咗車其實巳經到咗海下,沿途亦有好多指示牌。
一路往前行,去到呢個分叉位,要往下行。
我哋會見到個小沙灘。
呢度已經屬於海下嘅保護區,所以水清沙幼,唔知道嘅分分鐘唔知自己身處喺香港。
同友人影咗陣相,拍咗陣片,我哋就繼續出發。
上山途中,海下真係好靚…..
沿途會先經過個小碼頭。
因為已經係保護區,所以吸引咗好多人嚟浮潛同玩獨木舟。
筆者真係唔係賣廣告,但24 bottles 真心好好用。
之後會經過WWF嘅海洋生物中心,平時係唔會對外開放。
咁啱筆者去嗰日遇啱開放日。
除咗環境好,裏面仲可以認識好多唔同種類嘅珊瑚。
記住要好好保護屬於我哋嘅大自然。
之後沿路會見到行山徑,呢條路絕對係好好行。
大約30分鐘到,會見到攔路坳嘅分岔口。
今次筆者選擇去西營地,嗰日超好天,所以好多人camping….
當正自己去咗fuji rock 咁….
玩到咁上下,筆者就跟原路行返去海下,如果唔想行可喺南灣仔營地坐街渡到黃石。
快啲約埋朋友一齊去野餐啦!
作者:LKY的慢活生活