【十月懷胎】肚入面個 B 大咗幾多?用實物比對就清楚
懷孕是一個奇妙的過程,對準媽媽來說每一階段都很新奇,看着超聲波裏的影像,會疑惑究竟個BB有幾大?用實物比對就一清二楚啦!
4 星期
其實好多媽媽喺 BB 6 個星期大之前,都未會意識到自己大肚。頭 4 個星期媽媽都係照常返工、約埋一班姊妹去玩,完全冇諗過身體入面已經多咗個小生命。如果有日起牀發現琴晚卸妝唔乾淨,眼角仲黐住粒閃粉,唔好即刻抹咗佢呀!因為你肚入面 4 星期大嘅阿 B 就同呢粒閃粉一樣咁細粒,大約只有0.014 到 0.04 寸,而且只有 0.04 安士重。最重要嘅係一個生命就咁樣誕生咗啦!
5 星期
好多媽媽喺 BB 未夠 3 個月都唔會公開喜訊,怕 BB 小器,但可能就已經 FF 緊當公佈咗喜訊之後,會收到幾多 like、幾多心心。當你碌 IG 嘅時候,不妨細心欣賞下左下角粒心心,因為 5 星期大嘅阿 B 喺你肚入面就係得粒心心咁大架咋!佢已經有 0.05 寸高,重 0.04 安士,而且已經開始有腦仔、血管同心臟架啦!
6 星期
當媽媽每朝起身週身痛,喺網上分享自己嘅苦況時,可能會加 #孕婦晨吐未成日停過 #咁都叫做晨吐。雖然仲有段時間,BB 先會識搶你部 iPad 玩,但佢已經有你手機上嘅 hashtag 咁大啦!佢已經有 0.125 寸大,0.04 安士重。即管同阿 B 吹下水,講下 FB 興乜嘢,因為佢已經開始有耳仔、心臟開始跳動,每分鐘都會跳 80 下架。
7 星期
媽媽每朝起身可能會一邊作嘔,一邊感嘆阿 B 點解可以大得咁快,好多媽媽喺第 7 個禮拜都會升 cup!當你返工前,化妝時記得望望自己嘅眼線掃,你肚入面粒 B 就係咁大啦!半寸嘅身體加上0.04 安士嘅重量,開始有手仔、腳仔、頭仔、腎臟、口仔同脷添啊!
8 星期
阿 B 只有 iPhone App Icon 咁大
當媽媽開 IG、Whatsapp 嘅時候,留意下app icon嘅大細,就同肚入面阿 B 一樣大!0.63 寸、0.04 安士,開始生上唇、手仔、腳仔、鼻仔同眼皮啦,好快就可以見到 BB 個樣啦!
9 星期
對懷孕媽媽嚟講最慘莫過於戒口,無得食魚生!但一件壽司卷正正就係阿 B 咁大,大約有 0.90 寸同 0.07 安士,下次照超聲波你就可以聽到 BB 嘅心跳聲啦!
10 星期
身體出現變化,媽媽需要時間適應同覺得攰係好正常,但下次又開始周身痛時,不過想像下阿 B 就好似一條芝士腸咁大,開始生骨頭、軟骨同牙芽,而且慢慢變重,已經高 1.22 寸、重 0.14 安士。阿 B 仲開始有頸仔,眼皮都開始合埋去保護雙眼,頭仔都變得愈嚟愈圓。
11 星期
雖然媽媽依家已經冇以前咁有活力,但就有一個非常好嘅原因:因為阿 B 開始快速成長啦!佢已經有 1.61 寸同 0.25 安士,就好似一粒乒乓波咁,識得有表情同笑,同時都會開始踢媽媽個肚,但輕力到感受唔到。呢個時候 BB 已經開始生性器具,但超聲波仲未分到男女架。
12 星期
懷孕媽媽血糖會偏低,不如食返啲甜品啦,或者食個冬甩,特別係冬甩仔!冬甩中間個窿嘅部分就係冬甩仔 (Jelly Donut Hole),好多人都覺得仲甜過冬甩本身架!而且佢同阿 B 一樣咁大,2.13 寸、0.49 安士。佢可以都會想食番啖,因為佢嘅消化系統都開始生成啦!
13 星期
懷孕媽媽最啱種下植物架啦,可以令心情更靚之餘,亦可以產生更多氧氣。種番棵小仙人掌,仲可以紀念阿 B 嘅大細添,2.91 寸、0.81 安士。不妨問下阿 B 想幫小仙人掌改咩名,因為佢嘅聲帶都開始成長啦,雖然佢答唔到你啦,哈哈!
下一頁:14個星期至23星期又似乜?