×

Home

爸媽Junior文章打印

來自網址: http://www.ohpama.com/?p=144584

談育嬰 January 10, 2017

【傑。斯與晴】BB睡眠有辦法!?

小JM已經六個月大,自從上星期開始半夜會不停醒來搵奶咀,再安慰自己再瞓番,

但如果咁啱奶咀並唔喺手邊或手仔觸及得到嘅範圍內嘅話,

小JM就會開始 “求救",希望爸B同媽咪會喺夜晚「出手相救」

 

遇著半夜小JM求救,媽咪又點會真係就手旁觀(旁睡咋掛?),

點都會起身出手幫下小JM,幫佢搵番個奶咀嘅。(唔係就會嘈醒埋爸B架喇。。。

但最近小JM半夜醒嘅情況愈來愈多,到底點解呢?

 

為咗解開呢個「謎」,我呢位新手媽咪亦上網搵咗啲資料睇下,

希望了解下係咩原因同時希望幫小JM改善一下睡眠質素。

 

到底BB們有無特定嘅「睡眠模式」呢?

其實每個BB都會有唔同嘅睡眠模式嘅,而且睡眠模式仲會隨著BB長大而有所改變。

(就好似我哋大人咁,愈大愈夜瞓囉。。。曳!

 

一般而言,BB愈大睡眠模式亦會跟著轉變: 

 (a.) 初生 ~ 三個月

    。    一日大約瞓15個鐘左右;但每次可能只會瞓 2 至 3個鐘

    。    每日瞓覺嘅次數不等,因為BB仲喺適應期,嘗試適應喺母體外嘅環境,所以小BB瞓覺係不分晝夜架!

 (b.) 三 ~ 六個月

    。    每日嘅睡眠時間會少於15個鐘,而且睡眠時間已經明顯比以前長,可以瞓到3至4個鐘

    。    呢個時期嘅BB已經開始慢慢適應母體外嘅環境,而且仲開始慢慢會 On Schedule 咁去食同瞓添

    。    BB已經開始習慣咗 「夜晚要瞓」呢個定律,所以夜晚嘅睡眠時間明顯比日頭長

 (c.) 六個月 或 以上

    。    每日依然可以瞓上十幾個鐘,每次約 3 至 4 小時左右

    。    BB開始識自己調節睡眠時間

        (真正係: 一覺瞓到大天光! 爽呀!) 

 

當然,BB亦會因為某啲嘅因素而影響到睡眠質素,變到好似小JM咁,半夜醒幾次。。。

(唔知係咪吽緊牙仔呢?

另外,原來BB同我哋大人係有樣嘢特別唔同架,就係 ---》BB會愈攰愈興奮 

所以我哋唔好喺瞓覺之前同BB們玩得太過興奮好啲,以免BB夜一夜都唔願瞓

20170110_202
(網上圖片)

BB們瞓得唔好會有咩影響?

大人瞓得唔好都會忟憎暴躁,何況係BB們呢?

如果你足夠嘅睡眠同休息嘅話,

BB們都會因此而影響到情緒,會變到好忟憎豬,成日扭計,

再者就會影響到BB嘅食慾、新陳代謝同吸收,咁就會直接影響到BB嘅成長架啦!

相反,BB有充足嘅睡眠嘅話,瞓醒個刻就當然醒神一啲開心一啲啦!

 

點先令BB易啲入睡?

由小JM 初生到而家都試過好多種唔同嘅方法

而且隨著小JM愈來愈大之後,有啲方法亦好快變得 “唔Work" 

1.)用包被包住BB ,增加安全感(札粽咁札 

2.)臨瞓前沖涼

3.)沖涼後按摩

4.)沖涼後食奶瞓

5)聽住「白嘈音」來瞓

6.)較暗啲燈光 《--- (個人認為呢樣好重要,因為要令BB知道日夜)

 

以上嘅係小JM 初生到頭兩個月個陣我都試過,

但漸漸到小JM大咗啲之後,包被同白嘈音已經對小JM無效。。。

可能真係愈大個愈瞓得少嘅關係,小JM而家食完奶反而要玩好一陣先肯瞓。。。

 

以上之中,沖涼來講係對小JM最有效,每次沖完涼,

只要帶小JM返房由佢自己碌來碌去一陣就會好快瞓著。。。

真係最慳水慳力。

 

唔知你哋嘅小寶貝又係點入睡架呢?

P.S. 我同爸B都係唔主張抱住小JM直到佢入睡,因為我哋唔想做咗 「人肉搖籃」

希望爸B媽咪們同BB一樣有充足嘅睡眠啦!

 

最後就等我「開心些牙」小JM與爸B嘅溫馨片段俾大家睇下~

(其實只係爸B幫小JM抹面咋,都唔知點解小JM開心得咁緊要  )

 

(請點擊下圖以觀看片段,謝謝!)

作者:傑。斯與晴

相關文章:
【爸媽救星】幫BB安睡嘅公仔 媽媽實證真係work!
【新手媽媽心聲】晚上不能睡覺的苦況
寶寶為何不睡覺?