【LKY的慢活生活】在西貢的東西霸不能不到此一遊的點對點
2017-01-10
好啦,上次嘅老人山應該回晒氣啦,今次唔使擔心。
絕對只係有一少部分係需要比較多體力之外,其餘大部分都只係行石屎路。
今次去邊?
就係行出名景靚,又係地質公園同萬宜水庫嘅所在地,麥里浩徑一段。
好啦,講明唔辛苦,所以我哋選擇係西貢碼頭。
可以夾埋 4 個朋友搭的士入東霸,每人大約 25 – 30 蚊度,
今次因為都係無補給,所以記住一定要自備足夠糧食同飲品,仲有今次係會爬好少嘅石。
放心,筆者慢慢小心咁行,但為安全起見,希望大家自備手套。
而今次嘅沿途絕對係會有流動廁所。
好,講講今次嘅路線:
今次我哋會喺萬宜水庫東霸影下相,
再去遊官門遺洞,睇埋六角柱,
再由萬宜水庫東霸行去萬宜水庫西霸,再會行埋天文公園,
再行返出北潭涌。
行程大約5個鐘。
好,出發!
咁啱去嗰日有大型比賽,好多選手,欣賞住風景比賽,其實真係好開心。
一落車你見到嘅景象應該係咁,撞啱天氣好,其實根本隨手影。
根本你唔會相信呢個地方係西貢。
呢度亦係地質公園,希望大家都有自覺性保持清潔。
睇到旁邊嘅六角柱嗎?嗰啲係六角柱岩。
絕對係呢度嘅一大特色。
我哋會行落下面,好似四方形咁圍住行一個圈,中間會爬過一個山洞。
記住你向下行,請留意右邊嘅岩石,真係好特別。
再向下行,您會見到好清嘅水,我深信香港唔多機會見到咁清。
我都呆咗一秒。
如果唔信,自己一定要親身睇一下!
喺水池嘅旁邊,你唔難發現有好多洞比你哋影下相。
好啦,講過有一段係要戴手套,就係呢段碎石路。
當然,你唔想圍繞行一週,咁可以沿路行返上去,但筆者為影相就要克服一下。
再三叮囑大家要注意安全,量力而為。
不過真係有一種別有洞天嘅感覺。
呢個就係官門遺洞。
嚟到梗係要影一下。
去完東霸可以沿住車路行番出去西霸,記住要注意安全。
行返出北譚涌嘅時侯,沿途會經過創興水上活動中心和天文公園。
我哋成班行山友都落咗去行咗一陣,仲見到一群牛仔,感覺好舒服。
咁啱近排天氣有啲涼意,大家都快啲去大自然放鬆下。
作者:LKY的慢活生活