×

Home

 

廿四孝熱話文章打印

來自網址: http://www.ohpama.com/?p=145918

爸媽雞湯 January 13, 2017

【今日開始戒】爸媽最易在仔女面前犯的8個錯!

爸媽都係人,總會有情緒,總會犯錯。但係小朋友就睇爸媽頭,爸媽做乜佢學乜,尤其是未入幼稚園前那幾年,日對夜對,唔想小朋友吸埋你嘅負能量,就要好好反思留心啦!以下呢8件事,可能唔少家長都會喺仔女面前做過,你中了幾多項?

 

一 無耐性

係嘅,我明白,每個爸爸放工返到屋企,都會想舒舒服服咁攤喺梳化好好休息;每個媽媽做完一大堆家務,都會想靜靜地啦吓。但係當你見到化骨龍又搞到屋企亂七八糟,又或者扭計唔肯食飯唔肯做功課,你都可能會莫名火起。但你要記住啊,過於嚴厲嘅斥責對於小朋友不但完全無好處,反而會令小朋友以後更害怕你,更嚴重嘅時候,如果仔女都學埋你嘅無耐性,後果就不堪設想啦。

 

二 係又呻 唔係又呻

作為香港人,你有壓力,我有壓力。壓力大嘅時候,難免總會想呻番兩句,平衡番自己心理。有家長甚至忍唔住,喺仔女面前講「你知唔知為咗你,我有幾辛苦啊?」又或者「唔係你我一早就可以點點點啦!」之類。呢啲絕對係大忌啊!因為對仔女發出咁多負面情緒不但唔會對事情有幫助,而且仲會大大咁影響仔女,令佢覺得自己無用,係負累!

 

三 爆粗

相信大部分爸媽都唔會公開大講粗口,但有時喺屋企,又遇到令你發火嘅事情,難免都會衝口而出。但係記得如果俾小朋友聽到自己講粗口,佢哋好有可能會有樣學樣!所以最好就當然係做好榜樣俾仔女睇啦!

 

四 鍾意鬧交

有時候喺超市排隊遇著打尖,又或者有人大大力撞到自己一下,地鐵見到後生仔唔讓座俾婆婆,有啲爸媽可能就會據理力爭,繼而同人起爭執。但係如果俾仔女見到自己無時無刻都鬧交,佢哋可能會有種錯覺認為咁就可以解決問題。記得喺仔女面前,最好就係和平地解決紛爭。

 

五 瘋狂比較

「隔離陳師奶個女考到鋼琴八級啦,你就咁懶,日日都唔練琴!」「你表哥朗誦比賽冠軍啊,你呢?」呢啲係日常生活中經常可以聽到唔少爸媽會講嘅對白。但如果成日同其他人作比較,會令自己嘅仔女有好大壓力,甚至自尊心受損,覺得自己好無用!

 

六 打斷仔女

有時候仔女喺學校發生咗啲趣事,或者同朋友鬧交,可能仔女都會喜歡同爸媽分享。但係有時仔女表達能力未算好好,而爸媽又聽到不耐煩嘅時候,可能就會中斷仔女,或者幫佢講落去。但係仔女呢個時候正正就係練習同人溝通,如果爸媽多次中斷,仔女往往就會無癮,失去講嘢嘅興趣。所以爸媽應該多聆聽,或者多鼓勵孩子嘗試發言,咁先唔會令佢哋對於說話失去信心!

 

七 乜都買俾佢

有時候家長們實在太疼愛仔女,仔女話想要咩都會俾佢。雖然咁係會令仔女好開心,但係呢個絕對唔係愛仔女嘅表現!因為仔女往往就會變得唔識珍惜,變得浪費!家長絕對可以為仔女提供好嘅物質條件,但係千其唔好過分奢侈就可以啦!

 

八 講家人壞話

「你爸爸晚晚都咁夜返,肯定有問題啦!」「你媽媽正一大花筒!成日亂買嘢亂洗錢!」婚姻本來就係兩個人嘅事,就算出現問題都應該夫妻之間好好解決。同小朋友告狀唔單止對事情無幫助,而且會令仔女對爸媽反感!

資料來源:imama

相關文章:【孩子,你慢慢來】教育孩子 就像牽著一隻蝸牛散步

                【奧斯卡媽媽】如何輕鬆營造親密的親子時間