【慈慧幼苗】 我真係好鍾意撳!
2017-01-16
平常放工時間,啱啱要去深達8層嘅何文田站,梗係要搭升降機啦。前面見到一個年輕媽媽拖著一個5歲都未到嘅豆丁企喺掣前。你知啦,小朋友最鍾意係做咩……
冇耐, 小朋友撳咗L1, 媽媽就話:「我咪同你講咗我哋L2出,你做咩要撳L1?」
「咁有人撳咗L2,我都冇得撳。」小朋友理直氣壯咁回應。
「你咁樣亂撳掣係會影響到人,蹝晒人哋嘅時間,你咁唔乖,一陣間罰你要喺L1出。」媽媽態度堅決。
(呢個媽媽咁做就啱嘞,要小朋友為自己做嘅事負責任,係一個幾好的「適切後果」。) 我心諗。
說時遲那時快,小朋友開始扁嘴喊,裏面所有人都即時望住佢哋兩母子。終於到咗L1,門一開。點知…「唔,今次放過你,唔好喊喇!下次再係咁就一定要出去喇。」媽媽突然轉軚,小朋友即時笑番。
(小朋友喊兩聲就可以唔使負責?)
媽媽繼續講:「今朝搭落樓嗰時,你已經係咁,今次又係咁,你下次唔好再係咁嘞!」
(吓?頭先原來唔係初犯,仲要兩次都放生…)
小朋友亂撳,作為父母,事前或者發生時應該點做呢?
第一點
理解小朋友行為﹕
「撳」呢個行為本身沒有問題,只是小朋友故意撳錯樓層至會成為「不當行為」。
由以上個案睇得出小朋友其實好想由自己撳。
第二點
預防不當行為發生﹕
– 係入升降機前同小朋友事前協議,如﹕「而家我哋入,有需要嗰時我先會邀請你撳,入到去我哋就企定定等出。如果你做唔到,我哋會即刻出去。明唔明白?」
– 如果唔係第一個入,就減少企係掣前
– 如果第一個入,可以邀請小朋友撳啱嘅樓層,然後企到另一邊
第三點
發生時嘅建議處理方法﹕
– 製定「適切後果」,堅決執行。以上個案媽媽決定出升降機,由當時情況嚟講係幾理想嘅「適切後果」。除咗可以等小朋友承擔後果之外,亦提供咗一次機會等小朋友可以做番一次好行為。
– L1出後,父母記緊要同小朋友平視,講一次適當嘅「有效指示」,唔好提之前嘅不當行為,如:「我哋等陣入之後,有需要嗰時我先會邀請你撳,入到去我哋就企定定等出。」
– 如果小朋友企定定到L2,出之後,記緊要讚小朋友,但唔好提之前嘅不當行為,如﹕「你頭先喺度做得好好。」
個案及解說由慈慧幼苗社工 家嘉 提供
慈慧幼苗互動資源平台babyparent.org,免費教你把握小朋友6歲前嘅育兒黃金期。
相關文章: