【母愛最強】生BB仲辛苦過跑全馬？
2017-01-20
各位媽媽，如果你想參加馬拉松，但唔知自己係咪應付到，咁你可以放心報名，因為生BB隨時比跑足約42公里嘅全程馬拉松仲辛苦！
根據美國密歇根大學最新研究，分娩已經係人體能夠承受到最具創傷性嘅過程。研究團隊分析分娩及運動損傷嘅MRI掃瞄，發現分娩造成嘅傷害等同持續耐力運動（例如馬拉松）所受嘅創傷。不過好多時候，媽媽嘅痛楚其實都不受重視。
密歇根大學護理學院副教授Janis Miller指：「如果運動員係比賽時受到相同程度嘅傷害，相信已經即時送去做MRI掃瞄；但孕婦分娩六星期後，我哋會假設佢地已經康復，毋須再見醫生。但事實上，並非所有孕婦係六星期後都會完全康復，可以照常返工。」當中更提到孕婦如出現骨盆肌肉撕裂，可能會需要超過八個月時間治療先會康復。
研究分析68位高危媽媽嘅狀況，發現當中有四成媽媽出現骨盆肌肉撕裂，而有一成半媽媽嘅創傷更係永久無法痊癒。Miller提醒各位媽媽當感到身體不適時，應該盡快徵詢專科醫生嘅意見，而唔係繼續留係屋企做肌肉訓練。
專業運動員當然得到稱頌，仲有獎牌作獎勵，但係媽媽受到同等傷痛時，又可否得到適當嘅體諒？喺到向天下所有母親致敬，你哋都係十分堅強嘅人生馬拉松跑手！
來源：Fitpregnancy、Michigan News
相關文章：分娩時刻 印證偉大的母愛