送猴迎雞，每年年初一倒數7天前，都是各大年宵市場揭幕的大日子，要逛當然就揀全港最大的維園年宵作第一站吧！
自從有了小朋友, 已經一早謝絶了年三十晚凌晨才出發逛年宵的習慣. 每年也揀第一日之餘, 還是中午時份, 貪人少又易行.
誰知今年開幕第一天正正就是星期日，在皇室堡未過馬路SY已經大叫：「嘩！好多人都去行年宵架喎！」
今年是雞年， 一早已預料全場也是雞咕臣、雞攬枕、雞公仔……當然事實也是如此，不過當中亦有得意的選擇。
《愛回雞》 (251號鋪)，遠處已經發現攤檔大背景的那雙「雞眼」會不停轉動，我問：「呢度係米燒臘檔嚟架？」
少女回答：「係呀！我哋仲有兩雙雞，青色會叫$198，另一隻就$188(黑色呢隻都唔係雞)，係變種豉油雞嚟架。」
再往前行便到熟食攤位……此時腦細已不停叫咪：「毛記劣食呀！有A餐魚蛋燒賣，B餐燒賣魚蛋……」
我問：「鼻涕係咩嚟？」女工作人員：「係甜甜酸酸嘅漿嚟架，龍蝦汁仲一早賣晒添。」
改名的確很重要，明明就是甜酸汁被冠名鼻涕，即時想買，加上林日曦+100毛六個字，$45元雙併6粒配檸檬茶也乖乖付款是也。
SY:「爸爸１貴你又買? (因為人哋紅囉)，咩紅呀？點解劣食你又話好食呢？」(其實，解釋咗你都唔明，你繼續飲檸檬茶喇。)
與腦細集郵後，我們走到對面檔，SY望到專家Dicksone出的新書封面說：「E個哥哥好攪笑」， 人紅真的會連小朋友也不抗拒喎。
之後有一個攤檔佈置成地鐵列車車廂，出售的是非雞公物件，而是「吾讓坐」咕臣。
SY：「吾字無咗個口…」(玩食字囉!)，不過，自己覺得年青人佈景有如此大創意，也已踏出成功第一步，起碼吸引到我們坐低。
《PokeChicken》 (225號檔)，雖然沒有特別佈景，但所有年輕人也變身雞雞造型，而且還有主題曲,絶對煞食。
我問：「你哋D衫有冇得賣呀？」青年人答:「$200蚊，不過未有現貨，可以送到你附近地鐵站交收…」我很佩服你們穿足一整天雞雞衫，我的頭套戴上三分鐘，已經額頭不停出汗呀！
對面有非常熱血的九龍華仁經濟部同學，他們見我又拍片，又影相便問：「你係米師兄呀？」 我答：「唔係呀！不過我以前住你哋學校對面囉。」
之後有像真度極高的《睡是雞》( 213 檔)，有雞髀，雞翼各$168，SY：「真係好似我哋食嗰D雞髀喎。」
再向前行，突然有一個慈善檔位有姨姨手持光之美少女造型服：「5蚊， 5蚊」真的沒有理由不買。SY：「爸爸！你買嚟做咩？」，用來送給你穿著呀！
當我正在沉醉「執到寶」之際，SY大叫：「天下太平呀。」阿太話：「仲有東南西北添呀。」
這是《乘大玩具》 (153檔)~一班同學不停叫：「同我哋玩個遊戲，就可以有8折啦。」我：「E個繩波好得意，但好難玩。」SY：「E個叫劍球呀！爸爸。」
《雞包袋包雞包袋》(155號) 就連SY也知道：「我平時飲嗰包朱古力奶變咗雞奶喎。」而生命也變成生財添！！非常搶眼！！
《噢賣桔》(195)非常日系，因為離遠望，我還以為是Daruma，而且檔位還有位真人在飾演桔桔呀！
SY:「係頭咕嚟呀! 」桔桔男:「係呀! 有爸爸$98, 仔仔$65, 你哋兩父子買就最啱」(不過, 孤寒的我還是戴過便當擁有就最好啦)
最後, 阿太說:「哎呀! 動物園呀! 我玩咗十年嘅Game都有公仔賣喎」我:「我知呀…SY未出世你就玩啦, 係呀玩咗十年」
工作人員聽到:「嘩! 你玩咗十年, 咁真係要領養佢返屋企啦, $198蚊咋…我哋隻河馬都差唔多賣晒啦」阿太:「唔好咁大聲講畀人知我玩咗幾多年啦…」
意想不到的是第一天的年宵, 竟然也如此人山人海, 阿太:「今日星期日呀!梗係多人啦」 , SY:「嘩!下晝4點都咁多人, 夜晚咪唔駛行?」
作者：大仁生活