【你今日講咗未?】十句冧死老公嘅情深說話
2017-01-23
每個成功嘅男人背後,總有一個願意向佢表達愛意嘅女人!正面嘅言語可以為兩公婆嘅感情升溫,亦可以俾對方感受自己嘅支持同愛意。除咗「我愛你」之外,其實仲有好多聽完會好冧嘅說話。各位好老婆,一齊將以下十句學起嚟,今晚就講俾你嘅好老公聽啦!
1.「我相信你嘅決定。」
男人都想老婆相信同尊重佢,喺佢作決定後投下信任嘅一票,絕對係愛同尊重嘅表現。時刻提醒佢你有幾信任佢,對佢而言係非常重要,任何一段婚姻都必須要講個「信」字。
2.「好多謝你為我做嘅一切。」
結婚之後,大家會容易將對方所做嘅事視為理所當然。但其實感謝同稱讚都冇人嫌多嘅!如果佢為你做嘅小事,你都願意回贈一句「多謝你」或者「真係好感激你」,相信佢會更加願意喺唔同大小事上幫助你!
3. 親密咬耳仔!
正常人都有性需要,即使結婚已久嘅兩公婆,偶爾都可以嘗試重拾當初嘅激情同浪漫!勇敢向佢表達你嘅需要,話唔定會營造不一樣嘅甜蜜時光!
4.「今晚阿B等奶奶湊啦。」
好老公雖然想同你二人獨處,但都會明白你嘅忙碌。各位媽媽,不妨騰出一啲空閒時間,同老公過一晚二人世界,等佢知道自己仍然佔有你心入面最重要嘅位置。
5.「你係我最好嘅朋友。」
奧巴馬最近喺離職演說大讚老婆係佢最好嘅朋友,令人非常感動。結婚之後,相信兩公婆就係最了解對方嘅人。係人生高低起跌之間,你哋都一直互相扶持。話俾佢知你視佢為最好嘅伴侶,最好嘅朋友,等佢知道有佢喺你身邊,你係幾咁幸福同滿足。
6.「你一定得㗎!」
如果佢面前遇到困難、不知所措嘅時候,有你信任佢嘅能力,大力支持鼓勵佢,無論幾艱辛嘅難關,佢都一定可以越過。比起數算計較佢嘅弱點,不如放大佢嘅優點,多啲為身邊嘅老公打打氣!
7.「係我錯,對唔住。」
男人成日話老婆大晒,老婆做咩都啱。但事實上,有時我哋都好清楚自己先係做錯嗰個。認錯係好難,但如果永遠都等老公先認低威,好容易造成一種唔平衡嘅關係。正所謂「錯就要認,打就要企定」,其實無論老公定老婆,做錯事嘅時候一定要真心向對方道歉,而唔係講晦氣說話,咁樣嘅關係先會持久。
8.「你今日好靚仔呀!」
成日聽到老婆問老公:「我今日靚唔靚呀?」老公當然乘機大讚老婆;但其實老公雖然好少問到出口,但佢都好想知你覺得佢正唔正架!無論幾有自信嘅人,都需要別人嘅稱讚同認同,如果你覺得老公今日好醒神,著得好有型,不妨開口讚下佢啦!
9.「我真係好開心呀。」
男人最開心就係見到老婆開心,佢會以老婆係咪開心作為一種準則,去睇下自己有冇需要檢討嘅地方,並衡量自己做得好唔好。當佢為你做某件事,或者兩人共渡咗一個歡樂嘅晚上,令你心情舒暢嘅話,一於開心笑吓,話俾佢知你有幾開心啦。
10.「我永遠都咁愛你。」
婚姻係好神聖嘅事,兩個人由走進教堂嘅一刻,就已經決定會互相照顧,白頭到老。話俾佢知你永遠都一樣咁愛佢,等佢有種安全感,相信你哋未來係打風都打唔甩,亦俾佢知道成為佢嘅妻子,你係幾咁開心同幸福。
各位好太太,準備好今晚同老公講邊句未呢?
資料來源:Patheos