【德國升學】大學免費，中學要俾錢架！
2017-01-25
通常家長一諗到要俾仔女去外國讀中學，首選一定離唔開英、美、澳、加，這一類以英語為教學語言嘅國家。原因相當簡單，香港嘅中學生已經有一定的英語基礎，去到外國學校可以好快追上進度。不過來來去去都係這幾個國家，每年唔少中國、香港學生入讀，有時多到好似無離開過香港咁。
如果要去中國留學生唔多的地方，選擇一定係母語非英語的國家。德國大學近年吸引唔少學生，令家長留意德國中學。無他，因為依家除咗南部 Baden Wuerttemberg州收取國際大學生1500€一個學季之外，大部分以德語教學的德國公立大學都免費。唔少家長都希望仔女由德國中學開始適應，惡補德文，上到德國免費公立大學對學生同家長嚟講又平又唔錯。不過要搞清楚，德國中學並唔係免費㗎！
德國中學有公立同私立，國際學生一定要入有寄宿的中學，寄宿家庭喺德國反而相當少見。暫時公立寄宿中學收費由港幣7萬起至20萬一年，私立寄宿中學一年學費由港幣30萬起。公立寄宿中學低學費有吸引力，但收生極嚴，學校每年只會收 2 至 3 名中國學生，而且學生成績都要係平均B或以上。如果考慮入讀精英私立寄宿中學，收生情況亦差唔多。
咁當然之前亦講過，德國中學分好多種教學模式，唔係全部行精英制。但所有寄宿中學無論公立、私立都有一個共通點：預俾中國學生嘅位置有限。基本收生條件係，學生最低只可以由Grade9 (F.3) 讀起，Grade 10/11 (F.4/ F.5 ) 打後唔收生，因為Grade 11/12 (F.5/F.6) 學生開始準備高考。
想去德國讀中學要一早準備定，早兩、三年學定德文，至少都要達B1-B2程度，然後喺入學前一年揾定資料同申請。
相關文章：
【隔離飯香】德國教育制度解說
【德國留學101】高等教育學費全免？