【濕疹媽媽手嚟晒都值】李蘊:有你我方找到生存來源
李蘊,12歲入行,成為少女歌唱組合成員。24歲結婚,嫁給心愛的人。芳華正茂,生了愛女晞晞,面對因育嬰而來的問題卻通通甘之若飴,全因為愛。
全母乳的堅持令愛女健康成長。
夢想成真
「2016年可以話係夢想成真嘅一年 ,實現咗從小一直夢寐以求嘅大肚生BB,而且仲要係女,從來都未咁滿足過。」才25歲的李蘊,完全毫不掩飾她的湊女樂。
李蘊話:「因為我媽媽都係24歲生我,我同我媽完全無代溝,佢係我最好嘅朋友同傾訴對象,所以我一直都好希望同自己個小朋友好似我同我媽關係咁好咁close。而咁啱我又係24歲生女,所以好幸運好開心。」佢又話:「生咗晞晞之後,我9成9時間都用咗喺佢身上,基本上無真係屬於自己嘅時間。不過我好願意,因為被需要嘅感覺實在太好,好多謝個天送咗份人生最珍貴嘅禮物俾我。」
李蘊曾罹患媽媽手之苦,連毛巾都擰唔到 ,最終打類固醇先好番。
孩子第一
對着寶貝,她一點怨言也沒有。「我從細就喜歡小孩子,不只是說說而已。知道真係有咗後,與我幻想的一樣甜蜜,而且比我想像中更愛更緊張這個小寶貝。」愛女兒的,還有兩個契媽G.E.M.及何超蓮,雖然未正式上契,但是已經勁錫阿女。
兩個閨蜜G.E.M.及何超蓮亦做了女兒契媽,李蘊直言她們錫到囡囡燶。
李蘊年紀小小,母愛爆棚。她在社交網站引用Eason《天下無雙》的歌詞:「 有你我方找到生存來源,難行日子不削我對生命眷戀,因有著你跟我一起,親愛的你。」她愛女愛爆燈, 說:「乳腺曾經塞完左邊到右邊,之後再發燒兩日,一到半夜就燒到39度,但同時又發冷,好辛苦,最尾都係要食十日抗生素。」儘管如此,仍然堅持餐餐埋身餵,果然為母則強。
睡醒的晞晞變了小丸子內花輪同學,非常可愛。
女人最痛
除了發燒,更深受其他身體問題之苦。「生女後第一個月全身起濕疹, 好辛苦好痕,手腳全部爛晒,好核突, 情緒大受影響,郁啲就喊,醫咗成個月先慢慢好。到咗第二個月就是媽媽手,唔好講抱b,連毛巾都擰唔到 ,最終打類固醇先好番。」李蘊話幾辛苦都好,只要見到愛女晞晞健健康康就好值得。
李蘊話幾辛苦都好,只要見到愛女晞晞健健康康就好值得。
這個新手媽媽,為了丈夫要遷居內地,約一個多月回港一次,還沒有決定愛女在哪裏升學。目前,她正代理面膜,並在網上售賣,小試牛刀。「一切以女兒為先,我對她的愛,就算天塌下來我也一定會先保護妳,犧牲自己也不怕的那種愛。雖然很多新嘗試及挑戰,但真的不覺得累。」
撰文:吳一心
圖片:由被訪者提供