【男人模範】一個好老公必備7大條件!
2017-01-27
當一個女人結婚生仔之後,家庭往往就會變成佢嘅全部。佢嘅終極目標就係將仔女好好撫養成才,老公每日放工回家後都可以舒舒服服。時間一耐,媽媽們好容易就會失去晒當初結婚時候嘅激情,日復日嘅家務事更有可能令媽媽好懷緬婚前二人世界嘅日子!
但,其實如果爸爸們可以做到以下呢幾點,就已經可以篤中太太們嘅內心,令她們覺得好甜蜜,好心滿意足㗎啦!
1 遷就老婆的小脾氣
需知道,女人平均每個月都有幾日特別上火,容易發嬲。老公們如果sense到,就多多忍讓一下啦,佢哋都唔想㗎。
2 主動幫忙做家務/照顧仔女
雖然老婆無開口,但其實佢哋都好需要幫忙。有時候如果你見到老婆們手忙腳亂,不妨幫下佢哋手,或者照顧下仔女都好啊!
3 用行動證明自己嘅責任和擔當
與其得把口話「我會點點點」,倒不如用行動將佢做出來!你講十次「我會多啲陪仔女!」永遠都不及你親自為仔女講一次枕邊故事來得窩心。
4 多「做一個爸爸」
聽起來好似好玄,但其實礙於面子問題,不少爸爸都唔會主動向仔女(尤其係仔仔!)表達愛意。如果爸爸多啲透過唔同方法展示自己對於仔女嘅愛護同關心,唔單至仔女會感受到,媽媽見到都會覺得好欣慰!
5 多聆聽,尊重老婆想法
有啲老公一聽到老婆話想點樣點樣嘅時候,都未曾真正了解佢哋嘅想法就已經覺得唔好。有時候老婆需要嘅只係一個聆聽者,同埋一句鼓勵!
6 偶而捨得為老婆花點錢
唔係叫你個個月買名牌俾老婆,亦唔一定要等到生日架!老公們如果可以細心啲觀察到老婆想要啲乜,然後當作係小驚喜送俾老婆,就算只係一份好普通好便宜嘅禮物,老婆收到都肯定好開心!
7 關心老婆外家
正所謂「做人新抱甚艱難」。老婆時時刻刻都可能要為意家姑家翁有咩需要,但係就無得再好似以前做女嘅時候咁日日見到自己雙親。所以如果老公們可以多關心岳父岳母,多陪太太探望佢哋,老婆肯定好開心!
資料來源:imama
相關文章:【一看妳就明】媽媽的12個心聲