【慈慧幼苗】飲茶記

悠閒嘅星期日，相約咗好友食晏。佢老公揸車，佢同4歲嘅囝囝同我就坐喺後座。往市中心搵食嘅路途上，好友(下稱：媽媽)同囝囝討論去邊度食晏。

媽媽：你想食《Ｘ十嵐》定係飲茶？

囝囝：我想去《Ｘ十嵐》食壽司。                                                 

媽媽：不如去飲茶啦！飲茶都好好味，又多點心…

（哦！原來媽媽根本已決定去飲茶。咁…係咪假民主呢？）

囝囝：唔好！我想去《Ｘ十嵐》食壽司。

媽媽：唔得！我哋已經決定咗去飲茶！

囝囝扭計。喺呢個時候，爸爸梗係專心駕車啦！

第一招：氹

媽媽：（好聲好氣）你乖啦，飲茶好多嘢食，有點心，又有炒麵。

囝囝：(語氣相當堅定) 唔制！我要去《Ｘ十嵐》。

有我呢個外人喺度，媽媽又要顧全自己嘅面子，當然唔會屈服。又出招…

第二招：鬧

媽媽：（氣沖沖）你唔可以唔聽大人話㗎！你咁想去，自己去啦！

囝囝開始大喊。作為外人嘅我，當然繼續沉默是金啦！

媽媽再出招。

第三招：講條件

媽媽：不如咁啦！今日去飲茶先，聽日先至去《Ｘ十嵐》食壽司。

囝囝：(誓死堅持) 唔得！我要而家去食！

全程一言不發、專心揸車嘅爸爸，轉眼已安全送我哋抵達市中心。

落車前，兩母子仍然堅持己見，冇共識。

假日酒樓嘅門口真係熱鬧，我哋攞咗張飛係B278，而螢光幕上面顯示下一張係B147。

等，寂寞地等…還是要……

喺不遠嘅轉角處，《Ｘ十嵐》嘅門正為我哋而開，門前仲要唔係好多人。

結果，好友嘅飲茶夢碎，天意安排我哋今日去《Ｘ十嵐》食壽司。

呢個結局，最開心嘅應該係囝囝。

作為父母，你哋會用咩方法同子女商量去邊度食飯呢？ 小朋友不依時， 你又會點做呢？

喺呢個案，其實媽媽俾個仔選擇食店嘅自由度有幾大呢？

第一種：無限自由 →你想食乜呀?

第二種：有限度 → 你想食A定B呀?

第三種：已決定 → 知會式：我哋嚟梗會食A。

個案中媽媽其實一早決定咗去飲茶，就唔應該假民主咁問阿仔想食A定B呀?應該用第三種知會式，直接話俾阿仔知等陣食邊間，避免之後出現嘅衝突，唔駛又氹、又鬧、又講條件，破壞關係。

育兒解難同治病一樣，預防勝於治療，以下兩招都可以應用喺小朋友冇選擇餘地嘅情況下：

一)  及早預備

如果媽媽一早知冇得俾小朋友揀時，而佢有機會扭計失控，媽媽就應早一晚通知定小朋友，俾定心理準備佢，降低小朋友對決定嘅抗拒程度。

二)  預早協定

媽媽事先同小朋友協議。如果小朋友能夠配合決定時，便會有奬勵，例如：飲完茶可以去公園玩。如果小朋友做唔到，亦要有適切後果，例如：等陣冇得去公園玩。

小貼士：唔好假民主，俾清晰指令，預早協定就可避免不必要嘅情況發生啦！

個案及解說由慈慧幼苗社工 Rainbow 提供

慈慧幼苗互動資源平台babyparent.org，免費教你把握小朋友6歲前嘅育兒黃金期。

相關文章：【慈慧幼苗】 我真係好鍾意撳！