【慈慧幼苗】奬勵計劃訂錯目標 適得其反
2017-02-14
農曆新年,親友相聚嘅好日子,初四就去咗二姑媽度拜年。
二姑媽同表哥一家同住,表哥向來主張正面育兒,亦有一套自己認為有效嘅方法。
一入門口,表哥三歲半嘅囡囡「阿妹」就撲過嚟同我哋祝賀,仲好開心話俾我哋聽,尋日爸爸奬勵佢唔吮手指,就會帶佢去廸廸尼玩。作為育兒社工嘅我,雖然農曆新年身體放假,但靈魂依然返緊工。「奬勵唔吮手指」一路縈繞住我。
表哥未等我問,已經急不及待講俾我聽:「阿妹一直都戒唔到吮手指嘅習慣。我同佢約法三章,只要佢唔吮手指,就可以有一粒星星,儲齊50粒星星就可以去廸廸尼。你睇下呢個廸廸尼星星之路奬勵表,每次提到個表都好有效,阿妹即刻會放低隻手唔再吮!」
說時遲那時快,阿妹又再吮手指,表哥勞氣咁提:「你又吮手指?!你記唔記得我哋講好咗唔吮手指就有一粒星星?」阿妹即時放低咗手,表哥就獎咗佢一粒星星喺獎勵表度。最後,阿妹全日總共攞到10粒星星,應該離廸廸尼不遠矣~~~
奬勵計劃似乎唔太有效,如果係你,你會點做令小朋友唔吮手指呢?
解說
「吮手指」係好多小朋友都有嘅行為,原因可以有好多,當中可能係安全感嘅需要、出牙覺得痕癢等。而奬勵計劃(課程名稱叫「乖寶寶行為計劃」)目的係建立良好行為,因此目標設定要夠正面。
喺表哥嘅例子,「唔吮手指」係一個負面目標行為,而唔係要建立嘅正面良好行為。但唔吮手指嘅正面良好行為可以點訂立呢?答案係:冇。因為唔吮手指,隻手係可以做好多嘢,好難訂出清楚嘅正面目標做「乖寶寶行為計劃」。
其實,我哋可以嘗試用「ABC行為分析法」,睇吓有冇一啲「前因」、「後果」需要處理,會幫到減少吮手指行為。
另外,每當吮手指時,我哋亦可以用「精簡指示」叫小朋友雙手做啲嘢,例如:「亞妹,你幫爸爸抱住隻熊仔先。」過程中,避免強調負面行為:「你又吮手指!」
要記住,獎勵計劃主力建立正面良好行為,而負面不當行為未必一定可以由一個正面良好行為替代。因此,喺運用獎勵計劃時,訂立錯嘅目標,唔單止減少唔到不當行為,仲反而會鼓勵咗佢繼續做添!
個案及解說由慈慧幼苗社工 Kaka提供
慈慧幼苗資訊互動平台babyparent.org,免費教你把握小朋友6歲前嘅育兒黃金期。
相關文章:【慈慧幼苗】飲茶記