【傑。斯與晴】小B也會「分離焦慮症」？
2017-02-15
小JM隨著時間而慢慢成長，
當媽嘅當然開心，
但最近小JM每逢見我出門上班都總會哭鬧一番，
甚至不願意放手，抓著我不放。
尤其早幾天小JM生病發燒，
變得更黐身，只要我消失喺小JM嘅視線範圍內，
小JM都會哭個不停，就連去廁所洗手也成問題。。。
見到咁嘅情況，當媽嘅何其心痛呢？你話係咪？
唔知各位爸B媽咪們又有無同樣嘅經歷呢？
原來小JM以上嘅行為已經可以稱為 “分離焦慮症” 
咩係 “分離焦慮症” ？原來 分離焦慮症 （Separation Anxiety) 幾乎每個小B都會有，
係情緒發展嘅必經階段，只係有輕重之分而已。
一般 小B們 到咗半歲／7個月左右開始，就會開始意識到媽咪們嘅存在，
漸漸會開始依賴同黐住媽咪們，從而取得安全感。
相反，當小B們發現媽咪突然消失於眼前的話，
小B就會表現得不安，煩躁，甚至會哭鬧，
但當小B再次見到媽咪返來就會即時笑番晒。
如果小B們有以上徵狀，
就可能已經有 “分離焦慮症” 啦。
以愛搗蛋愛探索嘅小JM為例，只要媽咪或爸B喺身邊嘅時候，
就會好放心不停四處探索，
但當跌到或撞到就會第一時間以目光投向媽咪或爸B以取得關注，
或者會爬回媽咪或爸B身邊以取得安慰。
又或者如果我突然從小JM視線中離開，
小JM就會即時哭鬧，
真係想離開一陣都唔易
幫助小B克服 “分離焦慮症”既 Do & Dont? DO:
爸B媽咪們，可以透過以下數點來幫助小B們去克服 “分離焦慮症”，
－ 盡量回應小B，以安撫小B嘅不安情緒
－ 在離開小B前，爸B媽咪們自己都要表現得輕鬆自然，
再嘗試喺離開前同小B們溫柔咁”Say Goodbye”
－ 多啲同小B玩捉迷藏遊戲，以減低小B對媽咪／爸B突然消失嘅不安感
－ 轉移小B嘅視線及注意力
的確，每次出門上班前小JM都總會黐著我好一陣，
幸好家中嘅工人姐姐夠機伶，會幫忙抱開小JM。
雖然小JM會哭鬧或者扭計，
但我仍會笑住同小JM講：BB，媽咪要出們返工啦，BB要乖乖，媽咪放工就返來陪BB好無？
大多數時間小JM都會以一個歡欣嘅笑容作回答。
而我就會笑住慢慢地同小JM講拜拜再出門。
（除咗病完之後嘅頭兩日以外，大部分時間而言這個方法都係可行嘅。
）
）DON’T:
爸B媽咪們喺出門／離開小B們之前都要小心留意，千祈唔好因為小B喊而搞到自己都亂晒陣腳，
否則小B們就只會更加恐懼同不安；
千萬唔好強逼小B分開，或者靜雞雞離開，
因為當小B發現嘅時候就只會更加失落同恐懼分離；
切忌以呃得一時得一時嘅方式去氹小B們，
呃呃氹氹愈多，小B們對爸B媽咪嘅信任度就會愈低，
繼而變得唔再相信爸B媽咪。
所以，無論咩情況都好，
爸B媽咪們應該先冷靜自己，再安撫一下小B，
等小B冷靜後再用溫柔嘅語調同小B講你要出門同笑住講bye-bye，
相信小B們都會接收到你嘅”定心丸”。
題外話：
母乳餵哺小B係唔會令小B們變得黐身架，
母乳餵哺反而會增進媽咪同小B嘅親密時間同親子關係，
仲會令小B覺得更有安全感添。
作者：傑。斯與晴
相關文章：