【晴朗天】化痰止咳：羅漢果茶

2017-02-17

喉嚨乾，有幾聲咳，又未至於要去睇醫生，點樣做可以舒服啲呢？我哋慣常會去藥材舖買幾個羅漢果返屋企煲水飲，晴朗次次都好捧場㗎！
唔好睇小佢細細個，其實功效好大~

材料：
羅漢果 1個
水 2公升

做法：

1. 將羅漢果壓碎，我整碎嘅方法係用木飯殼，既方便又快搞掂！

2. 壓碎後，殼連籽一齊放晒落煲內

3. 加水中火煲20分鐘，熄火後再焗10分鐘

4. 隔渣倒出就可以飲㗎喇！

羅漢果茶唔使落糖已經好清甜甘香，好好味㗎！晴朗每次見我煲都會好期待~

飲剩咗嘅羅漢果茶可以放入容器，存放於雪櫃。有咳可以整番暖先飲，冇咳就凍飲都冇問題！

羅漢果具有清熱潤肺、化痰止咳功效。通常屋企有人病，我都會煲嚟一齊飲下。我試過多痰搞到成日咳，飲完真係會覺得啲痰鬆咗，痰冇咁濃，咳自然都少咗啦！唔一定有病先飲得，如果有時覺得食得多熱氣嘢，想清下都可以煲嚟飲。上次去bbq我仲特別煲咗一jar去同朋友分享添！燒完嘢食飲就至啱喇！估唔到啲小朋友添完一杯又再添，好搶手！整碎加水就煲好，話咁快就搞掂！不過中醫角度話羅漢果比較寒涼，唔適合寒底人飲用。有興趣嘅朋友，可以先請教中醫師意見再煲嚟飲啦！