【慈慧幼苗】講完大話肯認錯,就值得稱讚?
2017-03-09
相約朋友A去佢屋企,我哋一入門口,佢對孖寶即刻上前同媽媽嚟個擁抱同啜啜。噢!媽媽個心甜到漏啦!點知一轉頭,眼利嘅媽媽望到貼喺牆上面嘅獎勵計劃表,嘴角有微微抽搐。 (驚驚!發生咩事呢?)
媽媽:點解張表上面印咗成廿個 “Hihi Mimi” 上去嘅?我唔係話咗我先可以印架咩,邊個咁多手自己印印仔上去?!
妹妹:係哥哥印嘅!
媽媽:哥哥,係咪你做嘅?!
呢個時候,目擊證人就出現。
工人姐姐:妹妹唔可以賴哥哥架,要勇敢認錯。
媽媽目露兇光,好嬲咁望住妹妹。
媽媽:妹妹,係咪你做嘅?!
妹妹隻手抓住條裙邊,擰擰頭。明顯有啲心虛。
媽媽再問:妹妹,係咪你?!
最後媽媽問咗三次,妹妹終於肯認係佢做嘅。 (我心諗:唔知佢會點樣處理妹妹嘅不當行為呢?)
媽媽:唔!最緊要自己做錯事要坦白承認。好啦!媽咪俾個叻你啦!(好開心地讚賞)
(咦?!峰廻路轉,突然讚佢,仲豎埋手指公添?!)
媽媽好似安樂晒咁,然後放走妹妹去睇故仔書。點知一打開本書……
媽媽:邊個撕爛咗本書!爛成咁!
妹妹:哥哥撕爛嘅!
睇嚟媽媽又要審過……
解說
睇嚟個案中嘅妹妹好大機會又再講大話,好可能係媽媽用錯讚賞方式同埋冇處理到妹妹嘅不當行為。
妹妹講大話,仲要賴哥哥,媽媽問咗三次,認為妹妹最終肯認錯,有承擔嘅勇氣,就俾個叻佢。其實咁樣可能反而令妹妹誤會,原來做錯事之後,只要我肯認就得喇,唔需要為件事負責,仲要被人讚添。因此,媽媽應該嚴肅認真對待,即使妹妹承認咗,都唔應該讚賞,同時亦要妹妹知道咁樣到最後不單要承擔印印仔嘅後果,仲要承擔埋講大話嘅不當行為。
媽媽可以運用「撤去享受」嘅方法,於事後即時搵一啲佢喜歡做嘅事撤去,剝奪佢嘅權利(當然如果同印印仔有關嘅就最好),例如﹕收走佢個好鍾意嘅印仔兩日(如果佢嗰期好喜歡印野) ;冇得食平時喜歡的茶點等。媽媽應該就每件事件嘅嚴重性去決定「撤去享受」嘅嘢係咩,彈性處理情況。當然,預防勝於治療,下次媽媽應該收好個印仔,有好嘅預防,就自然減少不當行為嘅發生啦。
個案及解說由慈慧育兒社工 Kaka提供
慈慧幼苗互動資源平台babyparent.org,教你把握小朋友6歲前嘅黃金期,由香港理工大學同香港大學【教兒樂】專責社工主理育兒管教環節,香港大學李嘉誠醫學院兒科教授負責嬰幼兒醫護範疇,滙聚資深教育心理學家同言語治療師等,為你提供免費同及時嘅專業解答。
歡迎你like我哋Facebook Fan Page:Healthy Seed Parenting。
其他文章: