【慈慧幼苗】兩爺孫的「嘶殺列車」
2017-03-24
放工時間嘅金鐘月台真係好恐怖，如果有道時空門俾我穿一穿返屋企就好喇! 正當我發緊夢嘅時候……
「係咪呢!又上唔到車喇!」排喺隔離等車嘅爺爺，身材高大，連聲都大過人。我再望清楚啲，佢係咁推個孫上前，好想迫入車，點知閂咗門。
終於等到第三班車，車廂裏面只係剩番少少位，一開門，爺爺即刻抱起阿孫迫入去，阿孫可能覺得唔舒服，就喊起上嚟。而纖瘦嘅我就攝埋一二角。
「你好同我收聲喇，唔係返到屋企用籐條炆豬肉!」阿爺抱住個孫係咁鬧，阿孫就愈鬧愈喊得大聲。
終於到咗尖沙咀站，好多人落車，車廂即刻鬆動晒。阿爺放低阿孫，指住佢話：「你唔好以為喊得大聲就得呀! 推你上車又唔肯行，你係咪唔想返屋企呀! 唔想就留喺度啦!」個小朋友嚇到面都青埋，周圍嘅人都望住呢兩爺孫。
唉! 其實等多幾分鐘啫，咁樣恐嚇個小朋友，搞到佢愈驚咪喊得愈勁，而且會破壞兩爺孫嘅感情添。我心諗：其實只要阿爺做多少少，就可以避免呢件事發生。
解說
其實類似事件都好常見，家長往往因一時心急，好想達成一件事，而忽略咗小朋友嘅感受。好明白喺咁繁忙擠迫嘅環境，爺爺想快啲離開嘅心情。不過爺爺就冇留意到小朋友喺毫無心理準備下，突然被人抱起迫入車廂嘅恐懼。
如果爺爺早喺幾班車前，同阿孫講明要趕返屋企，我哋下一班車一定要上到嘅話，小朋友會覺得好好多。爺爺亦不妨試下當同小朋友玩遊戲咁，用輕鬆嘅語氣話：「嗱!我哋一齊睇住架車嚟喇噃。咪俾佢走咗喎，一嚟就上喇!」
紓緩番緊迫侷促嘅氣氛，如果小朋友已經 5、6 歲大，我哋可以同佢講：「因為放工時間，會有好多人，係會迫啲㗎喇，我哋忍一陣啦，我知你會做得到！」重點係等小朋友做好心理準備。
另外，家長千祈唔好用恐嚇嘅方式去教訓小朋友。因為咁樣只會令佢哋得個驚字，你講乜佢哋根本聽唔入耳，只會有反效果。為咗慳嗰2分鐘，結果用多20分鐘處理，又輸埋個「親孫」關係，值得咩？各位家長，俾小朋友足夠心理準備好重要㗎！
個案及解說由慈慧育兒社工 Rainbow提供
慈慧幼苗互動資源平台babyparent.org，教你把握小朋友6歲前嘅黃金期，由香港理工大學同香港大學【教兒樂】專責社工主理育兒管教環節，香港大學李嘉誠醫學院兒科教授負責嬰幼兒醫護範疇，滙聚資深教育心理學家同言語治療師等，為你提供免費同及時嘅專業解答。
歡迎你like我哋Facebook Fan Page：Healthy Seed Parenting。
其他文章：