【晴朗天】有heart小店 ─ 燃味棧

做人媽媽有時真係冇啖好食㗎！話說學校要家長協助小朋友準備做專題研習嘅資料，仲要計落考試分10%。收工就馬上撲去圖書館幫朗朗借書喇！搞到8點鐘圖書館都收工，先記起自己原來未食飯。經過「荃灣士林夜市」打算食少少嘢就歸家，點知竟然有開心大發現呀！
荃灣鱟地坊有多間小店售賣特色小食，呢間藍色小舖好吸睛，未知係食咩，但已經被佢嘅門面吸引咗埋去喇！

店舖原來主打嘅係烤卷，而其他小食都好吸引呀！

睇睇餐牌，決定試下佢哋嘅雞柳烤卷同埋小食併盤~

落單嘅時候，店主問我加唔加$5，可以加多款配料，芝士或菠蘿。都好喎！就加菠蘿啦！

新鮮熱辣嘅墨西哥雞柳烤卷出爐喇！馬上試味先！勁肚餓~

唔好睇佢店子細細，原來側邊都放得到兩個座位。望住咁多幅美味食物相片，食慾都大增呀！

講番個烤卷，外皮剛烤起，放上手暖暖的。生菜新鮮脆卜卜，雞柳係最後放上去嘅，熱辣辣，而且醃得好好味！菠蘿帶出咗雞肉更鮮嘅味道，仲有鮮甜番茄，簡直冇得輸！

又想試芝士條，又想食薯角，叫小食併盤就啱晒我呢啲心多多嘅人啦！XD

嘩！原來芝士條咁樣拉法啲芝士饀都唔斷，堅呀！唔怪得之佢個名叫做「馬蘇里拉芝士條」！外脆內軟，芝士味濃郁，必食推介！

薯角就係人都食過啦！一心以為冇咩特別，點知大有驚喜！外層勁脆，薯仔肉又熱辣辣。新鮮炸起果然唔同啲呀！好耐未食過咁正嘅薯角喇！

店主見我不停影相，問我係記者定blogger。哎吔！唔小心俾人發現咗添！@@”’ 仲問我有冇興趣試下新出嘅「法式蘆筍巴馬臣芝士薯」。本應已經食到好飽，但見店主盛意拳拳，即管試試啦！

賣相有啲似炸燶咗嘅玉子豆腐喎！

外面鬆脆，內裏有啲蘆筍蓉，加埋濃郁嘅巴馬臣芝士，味道超讚！就好似麥記嘅薯餅變咗厚切版咁呀！而且菜味加薯味混雜。好回味！諗番起都想再食~

除咗「燃味棧」外，「荃灣士林夜市」仲有好幾間小食店舖….

好似呢間售埋玉子燒嘅日式小店，係咪好有日本風味呢？

原味玉子燒

蘋果、櫻花蝦、蔥味玉子燒

黑糖、紫薯玉子燒

紫菜明太子玉子燒，好想試埋呢款呀！

美式熱狗店

除咗唔同款式嘅熱狗外，仲有炸薯條、雞塊、洋蔥圈、魚手指、薯蓉……等等，全部都好吸引！

食飽仲可以過埋隔離間店食甜品添！

店舖售賣多款用椰皇製成嘅甜品，亦有班戟、布甸同果汁~

「荃灣士林夜市」果然有種令我置身於台灣嘅感覺，愈夜就愈有風味呀！

「燃味棧」即叫即煮，食物味道帶俾我好多驚喜！而且店主熱情好客，亦關心食客嘅comment，都幾好傾呀！品嚐食物期間，見好幾個街坊嚟幫襯，都未開口，店主已經知道食客口味，支持者都唔少喎！相信好味同服務好先會keep到捧場客，我都好喜愛幫襯呢啲有heart小店呀！之後同朋友分享，原來朋友都去食街試過美式熱狗，仲極力推介我下次要試下。另外，串燒店都好好味！點解我冇留意到嘅？睇嚟下次要全家總動員出動先可以試晒咁多間嘅款式喇！

燃味棧 InTaste
地址：荃灣鱟地坊80-84號華成樓B座地下B4號舖
電話：6297 1314
facebook：https://www.facebook.com/InTaste.com.hk

作者：晴朗天

facebook專頁：https://www.facebook.com/happytrain123
blog：http://blog.xuite.net/chinglongtin/blog