【小周董世界】順從孩子意願，玩具無分性別。
2017-04-05
我好開心亦好幸運小周董出世至今，唔算特別曳亦唔算特別難教，最開心仲要個樣同我好似，哈哈哈~ 其實我本身無特別鍾意生仔定生女，但BB個樣咁似自己，有時真係忍唔住幫佢帶下頭飾~ 哎呀!! 好攪笑…好可愛啊!!! (哈~Sorry我都有”全世界阿媽都覺得自己仔女最得意病”…哈哈)
嘻~我的基因強大，小周董愈大愈似我，餅印母子….(戴咗頭飾其實真係有DD似母女~哈哈 )
不過唔知係咪小朋友每次見到戴完頭飾時，爸爸媽媽就會笑得特別開心，攪到佢有一排成日自己話要束頭髮同埋戴頭飾，工人姐姐幫佢整完個頭，佢不知笑得幾開心….我哋見佢玩得咁高興，無乜太大阻止佢，不過老人家見到就唔太鍾意，所以大咗就唔再玩lu。
小周董開始大，多咗去朋友屋企，PLAY GROUP同埋返N班，我哋開始了解到佢性格，甚至喜好，發覺到原來佢係一個唔鍾意車的男孩，因為平時如果有一大堆玩具俾佢選擇，佢會揀同公仔BB換衫，或者同小熊傾偈，都唔會拎起一架車車玩。
到接近2歲時，小周董仲多咗個興趣就係煮飯仔，去到邊只要有煮飯仔玩具都會玩足30-45分鐘，好投入。但當佢D興趣好似同其他大部分男孩子有分別時，身邊就總會有D朋友、親戚，曾經叫過佢: ” 哎呀~ 公仔唔係男仔玩架，煮飯仔女仔先玩架，你玩車車啦~睇下呢架…個架….車車幾靚、幾有型!”
而做媽媽的我為咗……唔想個仔好似好”特別”，同埋心唸唔知係咪佢BB時同佢玩過頭飾，攪到佢連玩玩具都偏女性化呢? 所以我曾經努力嘗試俾好多不同款車仔佢玩。但…小周董每次玩的反應就係………呆!!! 好似玩呢架”名車”，其他男仔玩到非常興奮，佢就木目表情玩咗3分鐘…之後就大叫要落車，唔玩 =.=
Umm….可能自己一個玩唔開心，搵埋朋友仔一齊玩車可能會好D? 但結果….佢連隻腳都唔想踏入架車入面=.= 全程做出一個想要逃跑的姿勢…哈哈
次次同佢玩車玩機械人佢都唔多開心，所以我自己都開始有疑問，點解男仔一定要玩車? 點解男仔就唔可以鍾意粉紅色? 所以我決定上網做下RESEARCH，發現小周董的情況並唔罕見，好多媽媽都有我呢個經驗，不過有唔少媽媽會選擇強迫性主導小朋友興趣，例如完全唔買任何所謂的女仔玩具，屋企全部只有車、機械人、超人玩具等，小朋友無得選擇之下，自然就會愛上玩車呢d男仔玩具。
但我睇左幾篇文章都提及到好多研究報告指出，其實目前部分玩具都仲有被標籤「性別」，例如醫生、司機職業玩具上會用男孩頭像，護士、老師職業就用女孩頭像，咁樣原來好容易會導致兒童長大後產生「性別成見」，甚至影響兒童對於事物及長大後職業的選擇，玩具中存在著「性別成見」或者會對小朋友帶來深遠的影響。
其實不同的玩具對兒童學習都可以產生不同作用：例如煮飯仔可以鍛鍊複雜順序的思維，容易與人分享；玩洋娃娃可培養看顧別人的能力，激發語言學習，培養同理心；積木可以培養空間感，有助於養成基礎的算術思維等等… 所以玩具應該是無分性別的，等如女孩喜愛玩車，亦可以訓練手眼協調、想像力甚至交通安全及不同車輛名稱等知識。
睇完一D專家分享我忽然覺得做父母其實唔應該強迫小朋友興趣，有時可能真係唔需要在乎太多外人的說話及目光。反正男孩子玩別人眼中女仔的玩具，暫時一D深遠影響我仲未見到，小周董鍾意玩公仔，唔知係咪咁令到佢日常生活中增加咗同理心，公園見到有小朋友跌親佢會走過去扶起身，學校見到同學仔喊佢會問老師拎紙巾，幫同學仔抺眼淚，呢D表現都令我哋覺得好感動。
而佢鍾意煮飯仔，對食物特別感興趣，所以同時好早就己經認識到不同食物的中、英文名稱、顏色等。
當然教導小朋友或者配合小朋友某種需要，我覺得倆夫妻都要有一致的共識，同埋大家齊齊作出適當的協調。就好似今次呢件事，我在網上做過一D簡單RESEARCH再同爸爸慢慢溝通，我同爸爸都認同應該隨著小朋友興趣走，小周董鍾意煮嘢食，我哋就早D俾佢接觸真實食物，順便可以教導佢不同食物或調味料名稱，甚至教導埋佢個人衛生、珍惜食物等知識，所以其實男仔玩煮飯仔都無咩唔好啊 ^^
最後我想講其實每一個小朋友都係獨一無二，每個人性格、喜好都唔一樣。作為新世代家長而家可以透過不同途徑接收好多不同信息或意見，有時真係要懂得”過濾”，因為未必全部資訊或意見都是適合自己的，聽得太多提點，作出太多比較，辛苦自己又辛苦小孩，最重要爸爸媽媽自己達成共識，一家人開心健康才是最重要呢 。
所以我覺得玩具應該係根據小朋友的喜好而揀，而唔係根據佢哋性別，小朋友仲細，父母有時如果可以放手俾佢地自由發展，可能會對佢哋成長更有幫助，不同玩具只要家長在旁同佢哋一齊玩，從旁教導，小朋友同父母一齊，就算只係玩隻臭襪都可以好開心呢。^^
作者： 小周董世界
|
|
