【小小豬】香茅青檸薏米水

踏入潮濕季節就當然要煲多啲薏米水，平日都係煲檸檬薏米水嘅我，今日就攪攪新意思轉一轉味道，嚟個泰式口味嘅香茅青檸薏米水啦！

薏米就係清熱利水、美白消腫，祛濕排毒之功效；糖冬瓜富營養，具有清熱生津止渴之效，而且本身就帶有甜味，所以就唔需要額外加糖；香茅就可以袪風除濕同埋消腫功效。材料都唔難買，去一轉街市嘅泰式小店，或者去超級市場都可以買到。

新鮮香茅6枝、青檸2粒、生薏米1両(約半飯碗)、熟薏米1両(約半飯碗)及糖冬瓜適量~

生熟薏米清洗乾淨，浸水最少半小時~

香茅洗淨，切成小段之後略拍鬆~

青檸榨汁備用~

記得啲青檸核都要除去呀~

煲內放入3L水，然後加入薏米~

待煲滾後，用大火加蓋煲約15分鐘~

然後就可以因應個人口味加入糖冬瓜，我大約加半包左右啦~

加蓋慢火煲45分鐘~

最後就可以加入香茅，再煲大約5分鐘~

熄火再焗多10分鐘之後，就先隔去香茅及薏米，待涼後就可以加入青檸汁~

咁就可以飲得啦~

簡單轉左少少食材，新口味就令都小小豬有少驚喜，佢仲話甜甜地又酸酸地好好飲添。不過我自己都覺得好好飲，好有泰國風味(依一刻真係好想去泰國添)，所以原來薏米水都可以有好多變化呀！

溫馨提示：由於個別人仕體質不同，所以大家記得煲之前了解下自己，如有疑問，請先向註冊中醫查詢！

作者：小小豬的成長日誌