【慈慧幼苗】點樣俾LIKE先最好？
2017-04-20
每日返屋企我都會經過一個公園，公園入面有一個養咗好多烏龜同金魚嘅水池。噚日放工返屋企嘅時候，我竟然見到有一隻小烏龜，估計「佢」一定係貪玩蕩失路，仲喺公園行人路上「橫過馬路」，我本來諗住做好心，拎番起隻小烏龜放返落個水池，但就喺呢個時候，有一把聲音阻止我嘅拯救行動……
媽媽：「嘩！仔仔你好叻喎！行路快過丸丸，你聽日再行快啲得唔得呀？」
小朋友：「得！」
原來隻小烏龜係有主人，我差啲就做咗偷龜賊。
小朋友回應：「咁我想同丸丸一齊食嘢得唔得？」
媽媽九秒九回應：「好呀，咁你同丸丸鬥快食好無？你要快過佢喎，得唔得呀？」
龜兔賽跑我聽得多，「人龜競食大賽」我都係第一次見，我睇住媽媽拎咗兩塊餅同龜糧出嚟，然後將隻丸丸放番落一個裝咗水嘅玻璃箱入面，之後一人一龜就喺度各自食嘢。
媽媽見到咁，就讚佢：「你今日食嘢冇之前咁慢喎，終於快過隻龜。一陣食晚飯試下食得快過媽咪好無？」 小朋友沒有反應就走咗去。
聽到媽媽嘅說話，我差啲就噴飯！呢位家長可能想用讚賞嘅方式提升小朋友嘅自尊心，但我聽到佢嘅讚美，我忍唔住要擰擰頭！