【慈慧幼苗】鬥堅持,鬥冷靜,一場冷靜耐力賽!

2017-06-02


香港人最鍾意去旅行,我都唔例外。早前同朋友到台灣來一趟放空旅行,喺台東池上搵咗一間一望無際稻田嘅民宿小住幾日。有一晚我同朋友打算在客廳飲花茶Relax之際,怎料見到成地明信片同雜誌。與此同時,一把女聲從後叫到:「俊俊,要執番好啲明信片同雜誌!」原來有個三歲大嘅男仔將雜誌架上嘅明信片及雜誌掉咗落地。最初,我以為呢位媽媽見到有其他人喺度,會自己快手快腳執番好啲嘢同「話個仔兩句就算」,點知呢位媽媽堅持要小朋友自己執番好啲嘢,過程就如兩母子比試緊「耐力賽」!

我同朋友沖咗杯花茶靜靜地坐喺客廳嘅另一邊,食花生睇show。

媽媽踎低,望住俊俊眼睛:「我講過你可以攞明信片同雜誌嚟睇,但之後要將佢哋放番上個架。依家夠鐘執好啲嘢啦!」語氣相當冷靜。

俊俊帶著天真嘅眼神望吓周圍嘅環境,佢未有理會媽媽嘅說話,仲跑到我同朋友面前。媽媽立即走過嚟拉走俊俊,重複對俊俊講:「請你依家過去將明信片同雜誌放番落個架上,知道嗎?」口吻比之前更堅定。

雖然媽媽態度好堅定,但俊俊態度更更更堅定,簡直青出於藍勝於藍, 「唔執」又「唔理阿媽」!

我心諗,如果我係俊俊阿媽,一定好激氣,叫極都唔聽。媽媽面對面再同俊俊發出最後通牒:「媽媽請你過去將明信片同雜誌放返喺個架上,如果再唔執好,聽日我哋就唔去公園玩啦!」

呢個時候,俊俊一聽到冇得去公園玩就即刻爆喊,更加唔理阿媽兼發脾氣走咗去, 仲邊行邊叫爸爸,似乎想搵阿爸幫手!

我同朋友都以為媽媽一定會心軟,放生俊俊,點知俊俊被媽媽拖住返「案發現場」。媽媽帶俊俊坐喺客廳一角落要佢冷靜落嚟。俊俊堅持不肯收拾,更多次逃出「冷靜區」跑到我同朋友面前,想尋求外援。媽媽繼續鍥而不捨,帶俊俊返去冷靜區,俊俊亦不甘示弱,一有機會就「逃跑」。如是者,兩母子來來回回冷靜區十次八次,過程長達半個鐘。

熱門文章

「恭喜 發奮 」|梁紀昌
03-08
小學決定你的人生基礎 請好好珍惜時間|梁紀昌
03-06
兒子被診斷患 自閉症 極心痛 每日尋找各種療法令人疲累 不如學懂接受令自己釋懷
02-24
兒童情緒|如何減輕 搬家 時為孩子帶來的心理壓力
09-20
教育孩子|孩子打人後的正確處理|何基佑
06-29

教養應該平平淡淡?|潮媽與威哥的正向教養
2024-03-28
尋找偉大的故事|梁紀昌
2024-03-27
認識自己的 優點 是一輩子的功課|希塔媽咪療日常
2024-03-26
四大常見 教養方式 3種有機會帶來負面效果|何基佑
2024-03-26
面對挑戰時驚慌失措?9句話從小培養孩子適應力及 抗逆力
2024-03-24
育兒漫畫|有一種不行,叫做你媽覺得你不行|牛媽彭小蹦
2024-03-24
查看更多   ▸