【擺脫性別定型】男仔玩公仔 絕對冇問題!
2017-06-27
隨住時代變遷,我哋可以認識到更多有關性別定型嘅不合理之處。仲覺得男仔係要著藍色衫、女仔係要著粉紅色衫;男仔淨係可以打籃球踢波、女仔淨係可以玩Barbie煮飯仔?
Huffington Post為咗證明男仔玩公仔其實係好自然嘅事,特意邀請唔同家長拍低佢哋仔仔玩公仔嘅可愛一面,話俾家長知,其實小朋友嘅行為唔應該受性別定型所限。一齊睇吓佢哋有幾Cute,再睇吓佢哋父母對仔仔鍾意玩公仔有咩想法!
一、「玩公仔其實係學做暖男好爸爸嘅第一步。」
二、「仔仔今年16歲,有自閉症。佢好鍾意迪士尼公主,要同九個公主同埋貓貓一齊瞓覺。自閉症有一樣嘢好,就係佢可以隨心所欲咁選擇自己嘅喜好,唔會理會旁人眼光。」
三、「Winston今年5歲,無論去邊都拎住手上嗰隻小小Winston仔。由於有兩個姐姐,所以佢一出世已經俾姐姐嘅公仔包圍住,從來冇覺得公仔應該淨係女仔玩。我好鍾意望住三個小朋友一齊玩公仔,扮爸爸媽媽,或者扮學校同學。我知道Winston將來會成為一個出色嘅爸爸。」
四、「Griffin只有一歲,去到邊就破壞到邊(睇吓張相背景就知!)但當佢聽到佢嘅BB公仔喊,佢會停晒手上所有嘢,攬實BB。」
五、「仔仔他日一定會係好爸爸,佢最鍾意照顧BB,餵佢食嘢,幫佢換尿片。帶BB出街行嘅時候,佢仲鍾意唱歌仔俾佢聽添。」
六、「仔仔好鍾意BB公仔同仲係BB嘅細佬。佢出世嘅時候係早產BB,當年著嘅小衫仔而家正好用嚟俾BB公仔著。」