【楠哥楠媽二三事】輕輕鬆鬆從小培養愛閱讀寶寶

楠媽自小唔愛閱讀，雖然跌跌撞撞都碌左入大學完成學位課程。但書到用時方恨少。做左媽媽之後，開始因爲育兒既問題而睇多左書，明白原來書中自有黃金屋真係岩架。

閱讀可以窺探別人既價值觀同想法，吸收前人既經驗，從而反省自己。

閱讀可以學到新知識，豐富自己。

閱讀又可以收心養性，提升專注力。

所以閱讀真係有好多好處。

楠媽我真係好後悔，點解我細個唔好好咁多看書呢，真係好蠢。所以，我同楠爸要好好培養楠哥閱讀既習慣。多鼓勵佢愛閱讀。

你可能話BB咁細個，閱讀係浪費時間，根本吸收唔到知識。其實太細個bb，只志在啟發興趣而已，即係令佢唔抗拒，到有興趣自發打開來看看。點樣開始？我地會用親子伴讀形式一齊去探索。身教好重要，要講多幾次，身教真係好重要，要小朋友愛書，自己首先都要愛書。咁先有說服力架。小朋友模仿/信任對象就係爸媽呀。

最初既時候大概6-8個月，我地開始比佢接觸布書。自然而然，佢會攞黎咬，偶然會望下，都唔緊要呀，有布書係佢附近當玩具就算。唔好太介懷佢有無睇。

8個月開始我地會買硬皮書正式一起看，原因好簡單，就係撕唔開。私心既楠爸楠媽買左「I love my daddy」，「I love my mommy」做佢第一本硬皮書(笑）。每晚用少少時間邊指住d字/圖畫邊大聲讀比佢聽，令佢注意力集中在你指住既位置，可以令佢專注力得以延續，內容其實唔重要，明唔明都唔重要，你讀得有趣，佢聽得開心（好多時楠爸楠媽自己作故事，扮豬仔叫，扮雞叫，好浮誇）。久而久之，佢會鍾意呢個親子活動。有興趣一起看之餘又可以親子下，呢個睡前活動都唔錯架。

現在我們伴讀，會多著重物件、詞彙。圖中楠爸一起數星星。一齊唱歌。(笑)