五感兒童郵票 玩得又舔得!
2017-07-04
香港郵政宣佈,今個月中會推出一套以「人體五感官」做主題嘅兒童特別郵票,呢套郵票會刺激五個感官,可以發聲、帶有香味,甚至可以試到雲呢拿味!
「人體五感官」郵票一套共五枚,係本港首次一次喺每一款郵票都加入唔同嘅印刷效果,每款都好好玩!「視覺」郵票之中有個圓孔形相機鏡頭,大家可以用佢嚟睇吓四周景物;「聽覺」郵票用咗熱熔印刷技術,令沙粒依附喺郵票表面,用手刮或者摩擦就會發出特別聲響;「觸覺」郵票採用咗熱感膨脹油墨印刷,令到籃球圖案有真實籃球嘅觸感;「嗅覺」郵票就散發住桃子嘅香味;「味覺」郵票背後仲貼有可食用膠水,各位小朋友舔吓佢就會試到雲呢拿味道㗎!
香港郵政話,希望透過呢套設計活潑有趣嘅郵票,去幫助小朋友認識各個感官,同埋滿足佢哋嘅好奇心。咁好玩,呢套郵票應該可以吸引到一啲本身無集郵嘅朋友仔嘅注意,可能可以令更多人加入集郵行列啊!呢套郵票喺今個月十八號正式發售,不過今日開始大家就可以買到同系列嘅首日封㗎啦!