【慈慧幼苗】幾時入「冷靜區」先啱?
2017-07-19
某天搭港鐵東涌線,乘客大部分都是去完主題樂園的一家大細,感覺就如上了一架親子專線列車。到了青衣站後,有很多人下車兼有吉位,正想坐下休息時,有位女士想叫她坐在對面, 貌似約四、五歲的兒子過來與她一齊坐:「阿仔過嚟坐呀!呢度有位啦!」同時這位男孩子旁邊亦有吉位,叫媽媽過來:「媽媽!我隔離都有位啊!你過嚟陪我坐,講故事書俾我聽呀!」媽媽與兒子呼喚了對方兩、三次,各自都未有動身,開始僵持,媽媽說:「而家媽咪要你過嚟,你係咪唔過嚟呀?!」此時故事書不小心跌了在地上,媽媽要兒子立即執番本書,可是兒子未有理會。
最終媽媽帶著怒氣走到兒子面前,指著他說:「做咩咁曳唔聽媽咪話,唔行過嚟坐?仲發脾氣唔執番本書?!」兒子依然沒有出聲,眼定定望著媽媽。此時媽媽按捺不住出手拉起兒子,要他站到門邊的企位:「呢度就係你嘅冷靜區,你同我企喺度掹耳仔冷靜吓,諗吓自己有咩唔啱!」兒子原本很冷靜,但被媽媽拉起唔准坐、更被罰掹耳仔後,即時情緒大爆發哭聲響遍車廂。
唉~似乎媽媽這次錯用了冷靜區!
解說:
上述個案中的兒子的動機很好,希望媽媽過來坐陪他看故事書,行為背後可能是親密感或其他的需要。但兒子因冇走過去,又唔執起本書,導至媽媽生氣。如果媽媽能冷靜明白兒子的需要,而非認為兒子唔行過嚟係唔乖,就係等於唔尊重媽媽的權威,可能媽媽的行動會好唔同,結果相信會好正面。
個案中兒子冇去執故事書時,媽媽其實只需走到孩子面前說出清晰指令,讓兒子執起本書便可。如果小朋友有更激烈的不當行為先需要進入「冷靜區」。「冷靜區」並非懲罰,而是讓哭鬧中的孩子冷靜後,再讓孩子進行活動,若孩子做得好就要讚賞佢,鼓勵孩子的良好行為。案中的兒子其實進入「冷靜區」前好冷靜,反而進入了「冷靜區」後就情緒大爆發。好明顯媽媽誤會了「冷靜區」的理念。分分鐘媽媽先需要一個「冷靜區」呢!
點.醒.家長
1. 任何行為背後的動機及需要都是正面,即使是不當行為。
2.父母可多了解孩子行為的動機,了解需要。
3.「冷靜區」作用是平伏哭鬧中孩子的情緒,而非懲罰。
4.家長要檢視自己的情緒,保持冷靜。
個案及解說由慈慧育兒社工 KaKa提供
慈慧幼苗互動資源平台babyparent.org,教你把握小朋友6歲前嘅黃金期,由香港理工大學同香港大學【教兒樂】專責社工主理育兒管教環節,香港大學李嘉誠醫學院兒科教授負責嬰幼兒醫護範疇,滙聚資深教育心理學家同言語治療師等,為你提供免費同及時嘅專業解答。
歡迎你like我哋Facebook Fan Page:Healthy Seed Parenting。
作者:慈慧幼苗
圖片來源:網上圖片
其他文章: