【開心回憶】舊公園三寶文具系列 @ 7-Eleven便利店

2017-08-07


去公園遊樂場玩兼盡情放電係每個小朋友童年嘅一部分呀!每次諗番起細個同兄弟姊妹落去公園玩,嘻嘻哈哈又一日,呢啲時光真係好令人回味。不過細個玩開果啲遊樂場設施都通通絕晒跡喇!雖然而家新設施顏色豐富啲、選擇又多樣化啲,但我始終都係鍾情於七、八十年代嘅遊樂場設施。唔知大家又有冇同感呢?
最近經過7-Eleven便利店見到呢一set舊公園三寶文具簡直係一見鍾情呀!好多童年回憶番晒嚟!*o*


好似呢款氹氹轉萬子夾座咁丫!我記得細個果陣係exactly玩過呢款㗎!但響邊個公園玩過就忘得一乾二淨喇!XD


合金製成嘅氹氹轉,拎上手有啲重量。手工精細,模仿得好逼真呀!放埋啲人仔萬子夾上去,用手轉動一下,十足十小朋友玩梗氹氹轉咁。細個響公園同啲三唔識七嘅小朋友一齊玩氹氹轉嘅片段又番晒嚟!XD


呢款旋轉式鐵滑梯又有冇玩過呀?


我當然有啦!仲記得香港仔石排灣某屋苑有一座一模一樣㗎!我都係呢條滑梯嘅常客嚟!轉兩個圈高速瀡到落底果下真係好high!不過已經係好耐以前嘅事,而家雖然屋苑仍在,但啲遊樂設施已經唔同晒lu~


話明係文具,梗係有佢嘅用途啦!滑梯頂部嘅白色圓形波波其實係磁石嚟!將佢分開一半,放上相片或告示,再貼番好粒磁石,可當作相架或告示座用㗎!


搞掂!冇諗過咁細粒磁石都咁好吸力,效果唔錯喎!張相係朗朗BB玩韆鞦時影嘅!都係BB果陣得意啲,可唔可以時光倒流呀?XD


到馬騮架出場!登…登….


細個同兄弟姊妹響馬騮架擒嚟擒去,你追我逐,都唔知留低過幾多腳毛喇!果然冇改錯名,我哋爬晒上去穿嚟穿去又幾似馬騮,但真係好好玩~ XD


馬騮架係一個筆座嚟呀!用嚟放響office插筆用,成日望見,返工都返得開心啲啦!^^

全部都係香港人嘅集體回憶!呢啲咁好玩嘅遊樂場設施已經唔會再響香港出現喇!雖然可惜,但就將呢啲美好回憶好好收藏響心裏面啦!舊公園三寶文具系列可以響全港7-eleven便利店買得到,由7月26號起發售兩星期咋!我去買嘅時候,最後一個馬騮架都已經俾我買埋。手快有,手慢冇喇!快啲買齊番屋企,懷緬一下昔日回憶啦!

晴晴遊玩公園三寶片段:

舊公園三寶文具系列
設計自:Tiny 微影
網址:http://www.tiny.com.hk/v33
facebook: https://www.facebook.com/tinyhk

 

 

作者:晴朗天

 

 

熱門文章

方媛分享女兒功課疑揭母女「約法三章」 郭富城堅持與妻女以廣東話交流
03-07
女子帶遇車禍、終生不能自理前夫改嫁 現任丈夫分擔照顧 餵飯、幫忙洗澡無怨無悔
03-07
病房陪愛兒3日直至去世 媽媽傷心辦喪禮 突然收到兒子訊息 結局超荒謬
03-06
唔怕改壞名︱2024 香港熱門中英文名字 榜首原來係呢個名...
03-08
天瑜腸道蠕動失調 暫時只能注射葡萄糖水 爸爸歷55次電療 癌指數已回復正常水平
03-08