【傻夫婦】東京親子之旅 Day 1-- 箱根小涌園溫泉樂園/ 箱根小涌園酒店

2017年 7月 14日 (星期五)

繼續第一日的行程，今次東京之旅的重點行程之一，之前其實有考慮過住【東京迪士尼樂園酒店】，問過阿旺同大頭妹，佢哋都話想浸溫泉多啲﹗小丸子就話想住 CINDERELLA房，但要成 7萬幾 8萬YEN一晚，實在太貴啦﹗﹗﹗又其實考慮過去睇【富士山】，但覺得帶住 2個小朋友，好似遠咗少少，所以最終就揀了去箱根浸溫泉﹗﹗﹗今次去完覺得箱根是好值得去的地方，真是要玩 3日 2夜，我哋玩 2日 1夜，好多嘢都未玩到，仲玩到 miss 咗班火車﹗嗚嗚嗚﹗

今次經 AGODA訂房，其實都好有多唔同的房種，同唔同的 PACKAGE，我就揀了入門的套房 (無私人風呂)，包早、晚餐，再包溫泉樂園的門票，計番都要大約 HK$4,000/晚，訂 2大 1小就是大約 4萬幾 YEN，小丸子未夠 6歲，EMAIL去酒店加多一個小朋友，住加大約 2000 YEN，之後再要加早餐 615YEN、晚餐 1544YEN、溫泉樂園 1500YEN，總共加多 5-6000 YEN，所以小朋友入住溫泉酒店是好抵，趁小朋友細個，真是要住多幾次，大頭妹滿 6歲，已經是另一個價啦﹗見有人話上日文酒店網站訂會平少少，但因為太多房種/ PACKAGE，自己日文又唔係叻，所以都唔敢喺日文網站訂啦﹗

另外，如果想房有私人風呂，就又要再多 HK$800-1000/晚啦，不過我見我哋都無咩時間喺房浸溫泉，另外酒店都有個『大浴場』，想帶 2個女去見識下…點知…哈哈哈…之後再講﹗

今日由羽田機場去到箱根大約是 11:00幾 12點，先去酒店 CHECK IN，但當然未有房，要 3:00 先有房，我哋放低行李，拿了樂園的票就去浸溫泉啦﹗整體都算幾好玩，原來酒店包 2日的入場，不過我哋第 2日去遊覽箱根，所以無再去浸啦﹗大頭妹同小丸子都話好好玩，阿旺就話…如果帶小朋友去可以玩半日，如果自己一個去呢，就應該可以玩『全日』喎﹗

酒店行過對面，大約 5分鐘就到，仲要有 shuttle bus。

完全唔似坐完凌晨機﹗