【荔枝媽媽】與別不同的生日會：生命的慶典 Montessori式生日會分享

謝謝孖寶的家人，陪他們一起度過了他們人生第一次蒙特梭利式生日會，因為聽從醫生的叮囑，孩子今年的生日不宜外出避免接觸病菌，所以簡單在家中同孖寶鍾愛的家人一起過生日，今年比較特別因為孖媽再去學習嘅原故，了解到很多蒙特梭利教學法，我亦有開始慢慢將自己學到嘅，用在兩個小人身上，希望可以同佢哋一齊由生活中愉快地學習同成長。亦來跟自己打打氣，加油，俾心機讀書呀！

講番今次蒙特梭利式生日會，其實係蒙特梭利教學法入面，賦予每個人嘅「生日」一個很特別的名稱，叫做「生命的慶典」Celebration of Life。

傳統生日party嘅焦點通常都係禮物、食物同玩樂。蒙特梭利式嘅慶生方法反而係用咗好唔一樣嘅方法去慶生，主要係俾小朋友去體會自己嘅成長歷程，以簡單易明嘅象徵儀式，加入一d科學認知，開啟小朋友對大地運轉同生命成長間息息相關嘅初步了解。

首先，用簡單的方法令小朋友明白地球同太陽嘅關係，俾小朋友聽有關自己生命嘅故事，父母要幫小朋友預備一d相，由出世到依家。亦可以選擇幫小朋友製作海報，喺彩色卡紙上貼上小朋友每個年齡嘅照片，可以加入一d說明文字，令大家可以更加認識生日嘅小朋友唔同年齡階段別具意義嘅事，大家一齊欣賞。而我哋就無製作到海報，因為我哋希望孖寶都可以一起做，一起參予，所以我哋改咗小小，而係同孩子一齊揀相，俾佢哋幫手放d相入相架嘅方法，而且相架亦比較方便佢哋自己拎住展示俾家人睇。

之後父母請準備12個月份的字條/flash card，更有心思嘅亦可以係每月份的字條上，顯示出相應季節、天氣。之後就可以分別將12個月份字條圍成圓圈，將蠟燭放喺中間代表太陽。

不過因為孖寶仲細，基於安全理由就改為由孖媽我製作嘅勞作太陽來代替真正嘅蠟燭。之後可以開始其他朋友圍埋一圈，問過生日嘅小朋友今年幾多歲，之後就將展示數字的字條比小朋友拎住，亦可以令小朋友理解基本數字嘅概念。

簡單咁話俾小朋友知放喺地上嘅太陽/蠟燭，就好似天空上嘅太陽伯伯，俾生日嘅小朋友拎住地球儀，沿著地上嘅生日盤慢慢行。小朋友幾多歲生日就行幾多個圈。孖寶今年2歲行2個圈就可以了。運用易明嘅語句話俾小朋友知呢個地球儀代表地球，亦即係我們地住緊嘅星球，地球繞著太陽公轉運行，地球每一次繞完太陽，一年就會過去了。話俾小朋友知地球需要花上一年嘅時間去圍繞太陽一圈，幫助孩子開始意識宇宙大地嘅奧秘，自己係宇宙間嘅位置。

呢個Montessori式生日會到尾聲啦，如果係用蠟燭嘅可以請生日嘅小朋友吹熄佢，而我哋呢就一齊大聲唱出生日歌作結，為壽星送上生日祝福！請孖寶同大家一起hug hug。

Montessori式生日會慶祝生日，簡單又有意義，雖然可能比唔上一般生日party嘅熱鬧，但係我覺得亦唔錯呀，脫去其他嘅一切，將生日嘅意義回歸到最原始嘅一份單純，同家人、朋友一起欣賞小朋友嘅成長歷程。用呢個方法慶祝生日嘅重點係小朋友本人，隨着時間嘅推移，小朋友可以開始理解一年係有12個月，當地球繞着太陽公轉12個月，一年就過去了，運用呢種簡單易明嘅形象遊戲，孩子好易就可以明白自己嘅成長同地球，同埋太陽伯伯嘅關係，亦可以同大家一起再次體會小朋友嘅成長足跡。

謝謝你們來到給予孖寶的愛，we love you all！

P.S. 部分圖片節錄自互聯網

作者：荔枝媽媽

我和孖寶的Facebook Page: 荔枝與孖寶 

我和孖寶的 Instagram IG#: laichimama