【小周董世界】懷孕初期的無奈
2017-08-15
好多人都話第二胎比第一胎會陀得辛苦D,當然每個人都唔一樣,但….我就被講中了。第一胎懷小周董時,只係攰咗2星期要早早瞓覺,其他一切如常,但今胎懷孕初期除咗經歷過無胃口、孕吐,仲有長期心口悶焗、反胃、企耐少少就見頭暈眼花。所以頭2-3個月日子好難捱。但最無奈嘅係,傳統上未夠3個月唔講得俾其他人知,亦未見肚,呢張相係懷孕2個半,又有邊個會估到我大肚呢? 所以不論公司、朋友或路人都未有留意<你是孕婦>。
先講我呢D在職媽媽,懷孕初期其實只會透露俾老闆或高層人士知,其他同事全部唔知,但偏偏每個媽媽都會經歷過,懷孕頭1-2個月係會無拉拉好眼瞓,攰到一個點真係完全不自控地要扒低瞓覺,呢D時候喺職場上總有一D特別關心你的同事,見你攰成咁向高層打小報告,而高層為咗替我保守秘密,但亦唔想得失其他同事,會建議我太攰不如請假回家休息吧!! 但今時今日有假我都留返遲D做產假,仲點會浪費用來回家瞓覺呢,所以唯有…..死頂,忍吧!!
另外,依舊因為傳統及擔心個胎未隱定的關係,除咗至好朋友,大部分朋友都唔會知道我懷孕,但偏偏呢個時候,同一大班朋友食飯,飲番2杯啤啤佢都少不了,而我就要七情上面咁講大話解釋點解唔飲得酒,對住自己朋友講大話…其實真係好難好難呢,更何況我自己都真係好想飲埋一份呢…哈哈…但為咗BB……忍啊!!
至於最無奈都係坐公共交通工具時,雖然優先座係可以俾孕婦、老人家、小朋友及有需要人士優先坐,不過我發現亦有好多40-50歲的高齡女士、長期望着電話的中年男士,又或是一班拖喼旅客坐着。當然我明白優先座其實任何人都可以坐,我只係想講我呢類懷孕初期的孕婦真係無乜可能坐到呢 ^^”