【傑。斯與晴】C。J の 爸媽手記。簡易製法。自家母乳Lotion
2017-08-16
啱啱過去咗嘅週末真係過得好充實， 特別係星期日！
因為試整咗熱製母乳Lotion ，
所以就算星期日要一早起身媽媽都覺得好幸福。
再者又可以留多一份「愛的回憶」，印證自己同小JM之間滿滿嘅愛，
仲有就係作為母乳路上嘅一個里程紀念。
原來不經不覺我都餵咗差不多十八個月了， 亦意味著小JM轉眼間已經將近一歲半了。
溫馨小提示：
一歲半又到啦，又係時候返健康院做檢查同打針啦！
母乳，對我而言除咗俾到小JM營養及提供小JM健康成長嘅所需之外，
仲係一份充滿愛而且貼心嘅禮物，係一種愛嘅連繫。
媽媽我係小JM未出世前都好擔心唔能夠成功餵哺母乳，
亦聽到好多嘅反對聲音， 幸好小JM乖乖，飲得好好，
夠小JM飲之餘仲可以拎來沖涼添。 呢點真係令到媽媽好安慰。
以前返工都會照泵奶，所以都儲落咗唔少，
因為當媽既總會「神經很大」胡思亂想，
一時又怕小B唔夠飲，一時又怕雪櫃出問題。
不過講到最傷心就莫過於要「倒奶」！
特別遇上小B厭奶嗰陣，眼睜睜見住啲奶仲剩一半就要倒真係會好可惜架。
仲有就係儲太多冰奶飲唔晒又係會浪費，所以多數會留來沖涼。
其實除咗用來沖涼之外其實都可以用來整下其他嘅母乳用品俾小B用嘅，
之前我就整咗兩款嘅母乳鏈來做紀念，
當時小JM剛好一歲，而今次就有機會試下整母乳Lotion！
講番今次試整嘅「熱製母乳Lotion」，
方法簡易，只要預備妥當材料就可以喺屋企整都得。
不如就等我同大家分享下「熱製母乳Lotion」製作過程啦！
熱製母乳Lotion
「熱製」意思係指以熱水慢慢隔水加熱而製成Lotion
呢種製作方法相對地可以擺放耐少少，約一個半月左右，
而且因為不含防腐劑及成分都以天然為主，
所以適合大多數嘅小B使用。
材料：
母乳 35-40ml
乳木果脂 1g
（Shea Butter）
橄欖乳化蠟 2.2g
（Olive Emulsified Wax）
甜杏仁油 5g
（Almond Sweet Oil）
橄欖油 2.5g
（Olive Oil）
（以上份量係根據小JM媽尋日整出來嘅成品而定喔， 但礙於有點手殘就係啦，所以有多咗啲）