【曾智華】教壞孩子的爸爸

暑假期間，特別多小童四圍奔跑，好事，因全部精力旺盛，又必須有合理渠道發放，例如在運動場上，將精力有益有建設性地用盡。

不過，情況多不會如大家想像般正路，例如，暑假期間，司機要特別小心，慎防有類似「過度活躍」小童在四周閃出，像老鼠仔般，防不勝防。

前日，我就幾乎領嘢，在某公共屋邨停車場找泊位，逐層慢慢搵，轉彎時，說時遲，那時快，突然有一小孩從暗角標出，嘩嘩，好彩立時煞停，否則大件事。佢背後亦同時追出一位三十多歲男人，應是爸爸，不但冇喝住個仔，反而大力拍我架車，喝：「喂，你有冇搞錯呀？」

呢種情況，我通常不會大庭廣眾辯論，尤其見到對方情緒有點失控，更無謂火上加油。於是，扭軚離開，但睹後鏡中仍見呢位躁爸爸指手畫腳，口中唸唸有詞，應在罵晒我祖宗十八代。唉……

停車場並冇Stop Sign，司機當然不會無情白事停車，而只會緩駛。但行人呢？則要非常小心，見車到就要停定，更不可亂竄。呢位爸爸不教兒子安全規則，反之有理冇理先罵人，恍似，罵人者就立道德高地。

小弟不禁想起近日網上看到一段文字：「今日的家長，都識字，甚至有高學歷、好學識，會要求，更多投訴，覺得道理永遠在他們一邊，不時要全世界作出遷就。培育出來的孩子，精通琴棋書畫、七八種外語、十八般武藝……一屋證書，但沒有一張是學做人的！」描述極精準。

回說剛才停車場一幕，我童年時試過N次，次次必被老父兜巴星：「你隻嘢，亂咁衝，累死人又撞死自己呀！」星得多，自然知道理虧而改善。如此，沒父親在旁時，也會望清楚才過路。

上述那位年輕父親，有事立即將一切責任推到別人身上，而不教兒子，真真教壞及可能累死佢。

作者: 曾智華

星島日報授權轉載