我成日聽到好多機構舉辦野外定向比賽，每一次見到都好想參加。雖然我哋都唔屬於戶外型，不過都好想同小小豬接觸一下唔同嘅活動，可以親親大自然得嚟又可以嚟個大考驗。不過….想就想咗好多次，次次一諗到喺山頭兩小時內來來回回搵CHECK POINT，怕小小豬應付唔到之餘，又怕會好辛苦，所以就等到今次先踏足我哋第一次的野外定向喇！
其實我哋今次係參加長春社舉辦嘅生態捍衛戰野外定向傳媒活動，當中有濃縮半個鐘版本。唔好以為半個鐘就係柴娃娃，因為在場有香港野外定向會為我哋設計CHECK POINT同物資，所以絕對係認真嘅簡易版比賽嚟呀！
小小豬之前未曾接觸過，所以佢哋非常期待，一支箭咁跑去場地啦~
今日係傳媒活動，所以都有明星哥哥姐姐(王梓軒、小肥、樂瞳、沙律、麥子樂)同小小豬一齊玩~
先嚟由專業嘅野外定向負責人教我哋點玩~
之後就派咗地圖、指南針、哨子同定向指環就可以開始比賽啦~
為咗想要第一個完成比賽，所以小小豬好努力咁睇地圖，計劃我哋四個CHECK POINT位置~
哈哈哈..大家都準備好，等待夠鐘就可以開始啦~
小小豬一聽到指令，就衝衝衝，向第一個CHECK POINT出發~
沿住地圖行(其實都係同一條路一直上)，話咁快就喺第一個CHECK POINT打卡啦~
之後又再努力搵下一個CHECK POINT，呢個時候我哋遇上子樂哥哥，佢仲拖住小小豬齊齊搵添~
有哥哥帶住就好快搵埋第二個CHECK POINT啦~
之後去下一個CHECK POINT就有點難搵，小小豬搵極地圖都好似每一條路都唔啱咁，好在最後有大會工作人員CANDY姐姐帶小小豬去搵~
