【葉偉麟】兄妹爭執，經常大打出手

六歲男童，父母經常出埠工作，主要由工人負責照顧日常起居生活。男孩在家中經常與工人及妹妹因小事磨擦，大打出手。

家長：「佢喺我地面前就好乖，講說話又得體又照顧細妹，但我哋一走咗，佢就對工人同細妺好多暴力行為，點解好似兩個人咁嘅？」

我：「你哋平均每星期會陪佢幾耐？」

家長：「我哋兩公婆成日都要周圍飛，可能一個禮拜會見佢哋一日啦。我哋一有時間盡量陪佢哋去玩。」

我：「例如玩咩呢？」

家長：「盡量玩啲需要合作，照顧之類嘅遊戲啦，順便可以訓練哥哥，等我哋唔喺度嗰陣佢會照顧細妹呀嘛。佢好合作架，玩嗰陣好生性好照顧細妹架！」

我：「或者佢只係「假扮」出嚟以博取父母歡心。老實講，畫公仔畫出腸，你估下你個仔知唔知你喺度玩緊咩遊戲？」

家長：「⋯⋯」

我：「如果有得揀，你估佢寧願做哥哥，定係做細妹？」

家長：「佢成日都話大個之後要做警察，要保護弱者架，佢梗係想做哥哥啦。」

我：「可能係，但亦有可能未必係佢嘅真實想法。如果我哋家長一廂情願「要求」佢要做好哥哥呢個角色，而佢暫時又唔想，咁佢有機會衍生一啲行為問題。」

家長：「佢已經對細妹有咁多攻擊行為問題，唔通訓練佢做哥哥應有嘅責任都唔啱？」

我：「呢個似乎係有雞先定有蛋先嘅問題。如果佢心態未Ready點去做一個哥哥，家長仍然對佢講「你係哥哥要照顧細妹，一定要讓佢呀」之類嘅說話，又或者特登做訓練，就只會令佢更加反感。佢有機會進一步將呢啲負面情緒遷怒於細妹身上。」

家長：「咁即係點呀？」