【葉偉麟】接納自己，接納孩子

五歲男童，情緒容易失控，經常出現攻擊行為，例如打父母和咬工人姐姐，父母因此對他施予更嚴厲管教，可惜情況不但沒有改善，反而更變本加厲。

家長：「佢好大脾氣，一唔俾佢要嘅嘢就尖叫大喊，有時仲打我又咬工人，我真係就快崩潰！」

我：「例如咩情況？」

家長：「佢着衫扣錯晒啲鈕又唔肯俾人幫、明明識用餐具都搞到成枱成地成身污糟晒、唔俾佢掂大人嘢如電腦，就即刻發晒癲失控。」

我：「咁你當時點處理？」

家長：「提醒佢囉，但佢多數話極都唔聽，咪鬧佢囉。」

我：「有冇諗過小朋友只係想自己親手做，但係又被制止？」

家長：「佢做得唔好嘛，啲嘢又做錯晒，甩甩漏漏咁，依家唔教好佢第時點教佢？」

我：「似乎當你見到佢做得唔夠好，就會有D唔高興，要即時糾正佢？」

家長：「咁都有問題？」

我：「如果自己嘅焦慮緊張感，感染到小朋友，甚至防礙咗佢探索嘅過程，咁就有機會衍生問題。有冇諗過佢情緒成日失控，係同自己唔夠接納佢有關係？」

家長似乎有點語塞。

男孩首次來到治療室接受治療，他望着我的頭，好奇地問我

男孩：「點解你無頭髮嘅？」

家長在他旁邊，不好意思，然後責備他。

我：「你似乎好好奇點解Uncle James 會無頭髮。其實有個故事架，你想唔想聽？我講多啲俾你聽。」

男孩：「好啊！」

然後，我向他們分享自己「光頭的故事」。

我：「我有一個女，當佢仲係BB嗰陣，每晚我都會起身餵佢食奶，所以都唔能夠好好咁瞓覺。可能攰得滯，開始甩頭髮，甩到中間穿咗個窿咁。我覺得自己好醜怪，好唔開心……..後來，我諗到一個辦法，就係決定剪晒D頭髮。開頭好唔慣見到自己無頭髮個樣，又好怕人哋笑我，於是我就去邊都帶住頂帽，唔敢俾人知自己無頭髮。」

孩子緊皺雙眉，聽得入神。

我：「有一日我出席一個活動，全部啲人我都唔識嘅，忽然個人問我：點解你一直戴住頂帽？⋯但係當時我又唔敢講個真相出嚟，因為我怕被所有人笑。」

孩子：「咁你點呀？」

我：「我當時真係好緊張，都唔知點算！⋯我諗咗一陣，最後決定將個真相講咗出嚟，跟住再除低頂帽俾佢哋睇。」

孩子：「咁啲人有冇笑你呀？」

我：「佢哋竟然冇人笑我，而且仲話，你光頭都幾好睇喎。我突然明白一樣嘢，原來好多時候只係自己驚，怕俾人哋笑怕俾人哋鬧，怕人哋唔接受自己。自己唔能夠接受嘅嘢，就以為人哋唔會接受。原來根本個事實就唔係咁。」

家長聽後，略有所思。

之後，家長對小朋友的相處方式漸漸開始改變。從最初極度緊張的關係，不容許任何出錯的「打鬧嚇」方式，慢慢變成接納形式，容許孩子從錯誤中自我學習。而孩子的行為及情緒問題亦不知不覺間改善了。

其實，每個孩子都是獨特的，沒有起跑線，更沒有終點線。接納孩子，容許他們在成長的過程中有一點「甩甩漏漏」，這就正正是接納自己的影子。

作者: 葉偉麟

文章獲 葉偉麟 兒童行為情緒治療師 授權轉載