【葉偉麟】畏高怕黑,被嘲乸型
2017-10-27
七歲男童,在校遭幾個男同學排擠,認為他既畏高又怕黑是欠缺男子氣慨,嘲笑他是「乸型」,男孩受杯葛下感到委屈孤獨,開始出現間竭性曠課。
家長:「我都明白俾人排擠係好難受,我已經成日勸佢唔好理嗰啲人,但完全無用,我仲可以點?」
我:「其實咁講,反而會令佢諗得仲犀利,更加逃避!」
家長:「連勸佢安慰佢都係錯?」
我:「唔係錯,只係勸告或者安慰呢類說話,好難運用得精準,因為崩口人忌崩口碗嘛!心理學上有樣嘢叫做「粉紅色的大象」,你愈叫佢唔好咁諗,佢就反而愈諗愈犀利。」
家長:「咁點算好?………一係俾佢參加D野外訓練嘅班,練大啲個膽咪冇事囉?」
我:「要由逃避轉變成為勇敢,係自我信念嘅跳板提昇;唔似射籃咁,練習得多技術會提高。但最吊詭嘅係,如果「家長要求」佢參加,以佢現時狀態一定會拒絕。但如果佢有足夠勇氣「自我要求」參加,咁佢亦無必要驚到唔返學啦。」
家長:「即係逼又死,唔逼又死?咁有咩方法呀?」
我:「肯定唔可以用逼架啦,但小朋友唔係言教嘅,佢哋係 Learn By Experience , 透過同佢建立嘅關係,利用治療室裏面好多唔同嘅安全平台,令佢有意無意之間改變咗都唔知。」