【葉偉麟】外表自負，內心自卑

八歲男童，成績平平，喜歡自我吹噓，每當別人對他作出更正的時候，情緒反應都會非常激烈，反控是別人或環境出錯，自己從來不會錯。

家長：「我都係想佢好啫，有時心平氣和同佢對功課，話俾佢聽做錯嘅地方，佢就突然火山爆發，覺得人哋針對佢！總之咩都覺得自己係啱晒。」

我：「情況出現咗幾耐？」

家長：「近呢一年越嚟越嚴重，老師仲話佢喺學校打人，唉，佢以前好乖架，我哋叫佢做乜都會聽聽話話，點解突然會咁嘅？」

我：「呢個可能係佢心底其中真實嘅一面，只係一直抑壓住無處理過，而家被釋放出嚟。」

家長：「控制唔到自己？我同爸爸已經成日教佢要點控制自己，又講好多道理，咁佢都唔夠理性？」

我：「假設有一日，你去買啲好餸煲啖靚湯，諗住煮餐好嘅慶祝，點知最後湯又煲乾、餸又炒燶，你好激氣好失望，你呢一刻最想你老公同你講咩？」

家長沉默細想：「⋯⋯」

我：「如果呢個時候，你老公攞本食譜出嚟對你指指點點，大廚一樣響你面前示範點先係五星級煮餸技術，你估自己會有咩感受？」

家長微笑：「咁又係……我都想聽到佢安慰嘅⋯⋯」

其實很多時候，我們只是「說了自己想說的話」，而忽略了「對方渴望聽到的說話」。

男孩來到治療室接受治療，尤其喜愛玩擲飛鏢比賽遊戲。

起初，他的分數很低，因為經常失手。
而我的分數，比他還低。

男孩：「乜你咁渣架！」

我：「係囉，原來真係好難控制，我仲以為好易添。」

男孩：「隻手要直啲，睇住，明唔明呀？」

我：「我原來要咁樣，等我學下你先。」

後來男孩，像魔鬼教練一樣不斷示範了各種擲飛鏢的招式及姿勢，例如躺在地上、蒙着眼睛等等，更加是創意無限！

男孩彷佛把現實中師長們對自己的嚴厲要求，透過這個過程投射到我的身上，他對我的磨練特訓，看見我成功了，其實就正正現實化及形象化地化解了他的自卑感。

在不知不覺間，我們兩人擲飛鏢的工夫都提升了。

兩個月之後家長對我說：「佢啲脾氣好咗好多，唔再成日認叻。最近發生一件事令我好感動，佢喺學校唔小心倒咗painting落同學件衫身上，佢識得當眾道歉，識得點樣處理錯誤，比起佢以前肯定會發晒爛渣話唔關佢事！ 老師仲特登打電話俾我表揚佢。」

我：「其實佢一直係個好理性，好有自我控制力嘅小朋友，只係未遇到機會俾佢發揮出嚟啫。」

其實，當孩子真正感到已有能力，已經不需要依賴吹噓，去「告訴其他人」自己的能力了！

作者: 葉偉麟 

文章獲 葉偉麟 兒童行為情緒治療師 授權轉載