【小小豬】龍脷葉紅蘿蔔湯
2017-10-12
每日最苦惱莫過於行街市但又唔知買餸好，正當我諗緊煲咩湯時，見店主今次返咗好多龍脷葉，新鮮得嚟又幾靚，所以就買嚟煲湯俾兩位老細飲。
依家已經係入秋，好啱飲一啲清潤又潤肺嘅湯水，雖然龍脷葉一般係用作止咳，但唔係咳先可以飲，有時都要預防於未然嘛！
紅蘿蔔兩條、龍脷葉約$15、無花果四粒同埋西施骨$35~
龍脷葉洗淨，然後用鹽水浸泡一陣~
西施骨汆水備用~
紅蘿蔔去皮洗淨切塊；無花果洗淨~
煲內放約3L水，待煲滾後加入所有材料~
待再次滾起後，繼續先用大火加蓋煲約15分鐘~
之後就轉用慢火加蓋煲約1.5小時~
最後加入少少鹽調味就飲得~
龍脷葉我都煲過唔少次，我家兩位老細都好鍾意飲，今次加埋小小豬最鍾意嘅紅蘿蔔，佢又點會唔鍾意，轉眼間一煲靚湯就俾佢兩父子清晒。不過….其實啖湯清清地又甜甜地，都真係幾啱飲。另外，飲完湯之後喉嚨又幾舒服，所以都真係幾啱依家帶有點點涼風嘅時候。
溫馨提示： – 由於個別人仕體質不同，所以大家記得煲之前了解下自己，如有疑問，請先向註冊中醫查詢！
作者：小小豬Kinsey
