我們這一家
2015-09-16
我教仔一D都唔叻
我對仔, 一直都神級咁惡搞
又野蠻, 又任性
又鐘意係公眾埸所大叫大喊
偶爾, 仲會大街大巷「典地」添…
容我先介紹一下自己先
我係 Gill 仔
我有一個好唔負責任的老公 – 鴻仔
仲有兩個好兇狠的囝囝 – 朗朗同魚仔
由哥哥一歲開始, 為左記錄佢的成長, 開始左寫blog生涯
不知不覺間, 寫左4年啦…
我係一個全職媽媽
屋企冇工人姐姐幫手, 一腳踢
實情, 我份工, 真係忙過好多在職媽媽架…
好多人問我, 點解你湊兩個都唔請姐姐, 攞苦黎辛…
係呀, 湊佢地真係好好好辛苦
每日又要煮飯、洗衫、湊仔、教仔、執屋、做清潔
乜野都要做, 乜野都要管
但係, 我真係好享受同阿仔佢地一齊
我實在好唔願意, 係我同阿仔佢地之間, 出現一個「第三者」…
有姐姐雖然係嘆好多, 但大概…母子之間的互動相對又少了點吧…
我同鴻仔跟你們一樣, 都係湊仔界初哥
唔太懂得做人爸爸、媽媽
尤其是鴻仔呀, 係我眼中, 佢根本就係一個大細路
仲記得, 初初有朗朗時
鴻爸爸佢一直都覺得好煩厭
成日都抱怨阿仔好扭計, 好嘈吵…
去到有埋細佬, 佢就更加頂唔順啦…
無他的, 細佬每秒鐘都係咁…
每五分鐘一細喊, 每十分鐘一大喊……
再黎, 都仲係喊緊…..
唔係講笑, 我地兩隻仔真係好鬼喊得架
有時, 我覺得都好難怪鴻爸爸
鴻爸爸係我眼中, 曾經係一個極差勁的爸爸
乜野都唔願意承擔, 乜都唔想理
為左唔想D仔喊, 佢可以長開電視二十四小時
為左唔想煮飯, 搞咁多野, 佢會煮公仔面俾兩兄弟, 咁就當一餐
係餐廳時, 會因為小朋友扭計, 突然自己坐開, 一個人吃飯, 掉低我地三個
亦試過細佬番學, 搵唔到校服而迫細佬著哥哥的校服
(但明明兩兄弟係讀唔同的學校, 事到如今, 我都唔明點解佢會咁俾細佬番學)
仲試過帶哥哥番學, 一抱起佢就走, 忘記佢未著鞋, 讓佢赤腳番學……
曾經, 我對佢真係感到好失望…好唔明佢點做人爸爸…
我地鬧過好多次交…
最後, 佢同我講, 五年來都鐘意唔到兩個仔…
時光飛逝…我地一家人吵吵鬧鬧的, 咁就過左快要六年啦…
呢幾年間, 大家都成長左唔少…
其實最開心, 係見到鴻仔爸爸的成長哦……
近呢一年, 佢進步左好多
開始學懂得同阿仔佢地相處, 冇咁多小朋友脾氣
會同阿仔佢地傾下計, 了解佢地的興趣
偶爾, 仲要同阿仔佢地一齊洗白白, 玩作一團添
眼見佢同阿仔佢地相處愈來愈融洽, 大家都好愛惜對方
我心裡面都好欣慰…
做人父母, 唔容易哦…
要教好小朋友
最緊要就係一家人融融洽洽, 兩夫妻相親相愛
大家加油哦
作者：80後媽咪