【晴朗天】健康好飲牛油果籽茶

牛油果一向係女士們減肥嘅恩物，易有飽肚感之餘，卡路里又唔高，我都好鍾意整沙律時加牛油果㗎！但大家又知唔知牛油果由內到外都有食用價值呢？今次就想介紹一下用牛油果核所整嘅牛油果籽茶，健康好飲，最重要係零難度丫嘛！

材料：
牛油果籽 1粒
水 1000毫升

做法：

1. 將牛油果切開一半

2. 取出牛油果籽

3. 將牛油果籽切成薄片 (切落去有啲似切緊紅蘿蔔，比想像中易切)

4. 切好之後，牛油果籽上嘅皮有啲會甩甩哋，用手搣好快就搣甩晒出嚟！

5. 放入水中煮30分鐘就煮好㗎喇！

煮起咗嘅牛油果籽茶係粉紅色嘅！係咪好靚呢？但佢係天然無添加嘅色素嚟呀！

加入檸檬片或檸檬汁會更美味~

晴晴都話好飲呀！「good good」聲同我清咗杯茶喇！

等我都嚟番杯先！umm…同熱檸檬水好相似，唔同嘅係粉紅色，同埋唔落糖都夠味，好飲喎！

據聞牛油果籽茶具有減肥功效，而家每晚都會煮好等食完飯之後飲，已經變成咗習慣喇！

係咪冇難度呢？簡直易過借火啦！一向都知道牛油果有護眼、降低膽固醇、減低食慾、有助腦部發展等多種功效，但冇想過原來牛油果籽都咁有益處。佢含有豐富水溶性膳食纖維，落到個胃度可以吸附糖同埋脂肪變為啫喱狀，有效改善腸道健康。腸道健康咗，血液循環同身體燃脂力都會好啲，簡直係消脂排毒嘅好幫手呀！

除此之外，仲有降低膽固醇同增強抵抗力嘅功效添！有咁多益處，每日飲用就更健康啦！聽聞有日本女星飲完兩星期減咗接近18磅，係真唔係呀？我自己就唔太相信可以極速減磅，但持續飲用，應該係會對健康有幫助嘅！

不過大家要留意整嘅時候雖然話牛油果籽比想像中易切，但都要小心切嘅時候滑手喎！煮好之後，最好一兩日內飲晒！始終無添加唔放得耐嘛！健康又好飲，一於煮埋畀家人一同分享喇喂！

作者：晴朗天